ភ្នំពេញ៖ កម្មវិធីអភិវឌ្ឍន៍អង្គការសហប្រជាជាតិ (UNDP) ដែលបានផ្តល់ឱ្យនូវស្ថានីយសាករថយន្តអគ្គិសនីមករដ្ឋាភិបាលកម្ពុជា ត្រូវបានឯកឧត្តមឧបនាយករដ្ឋមន្រ្តី ស៊ុន ចាន់ថុល ថា បានរួមចំណែកទាក់ទាញចំណាប់អារម្មណ៍ប្រជាពលរដ្ឋ ឱ្យងាកមកសិក្សាបន្ថែមលើការប្រើប្រាស់ប្រភេទយានយន្តអគ្គិសនី។ 

ការលើកឡើងយ៉ាងដូច្នេះរបស់ឯកឧត្តមឧបនាយករដ្ឋមន្រ្តី ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (CDC) ធ្វើឡើងក្នុងជំនួបជាមួយនឹងលោកស្រី Alissar Chaker អ្នកតំណាងកម្មវិធីអភិវឌ្ឍន៍អង្គការសហប្រជាជាតិ (UNDP) នៅថ្ងៃទី០៧ ខែកុម្ភៈ ឆ្នាំ២០២៤ ខណៈដែល UNDP បាននិងកំពុងគាំទ្ររាជរដ្ឋាភិបាលកម្ពុជាក្នុងការប្រើប្រាស់យានយន្តអគ្គិសនី។

តាមការចុះផ្សាយរបស់ CDC លោកស្រីតំណាង UNDP បានសន្យាយកចិត្តទុកដាក់ជួយកម្ពុជា ក្នុងការរៀបចំគន្លឹះអភិវឌ្ឍន៍នានា និងស្វែងរកសក្ដានុពល ភាពទាក់ទាញរបស់កម្ពុជាក្នុងការវិនិយោគ ដើម្បីបង្ហាញដល់បណ្ដាវិនិយោគិននៅលើពិភពលោក អាចស្វែងយល់អំពីកម្ពុជាឱ្យបានកាន់តែប្រសើរ។

គួរបញ្ជាក់ថា សកម្មភាពផ្ដល់ស្ថានីយសាករថយន្តអគ្គិសនីមកកម្ពុជារបស់ UNDP បានអនុវត្តស្របតាមការប្ដេជ្ញាចិត្តរបស់រាជរដ្ឋាភិបាលកម្ពុជា ក្នុងការពង្រីកការប្រើប្រាស់ថាមពលស្អាតឱ្យបានប្រមាណ៧០% នៃថាមពលសរុបត្រឹមឆ្នាំ២០៣០ និងស្របតាមគោលដៅអភិវឌ្ឍន៍ប្រកបដោយចីរភាពដាក់ចេញដោយអង្គការសហប្រជាជាតិផងដែរ៕