ភ្នំពេញ៖ ឯកឧត្តមបណ្ឌិតសភាចារ្យ អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លើកទឹកចិត្តដល់ម្ចាស់សហគ្រាសធុនមីក្រូ តូច និងមធ្យម (MSMEs) ត្រូវទាញយកអត្ថប្រយោជន៍ឱ្យបានជាអតិបរមា ពីការគាំទ្រទាំងឡាយរបស់រាជរដ្ឋាភិបាល ដើម្បីបន្តអភិវឌ្ឍខ្លួន បង្កើនសមត្ថភាព និងផលិតភាព ពិសេសត្រូវចាប់យកបច្ចេកវិទ្យាឌីជីថលក្នុងការបង្កើនភាពធន់ ដើម្បីឆ្លើយតបទៅនឹងការវិវត្តយ៉ាងរហ័ស នៃនិន្នាការតំបន់ និងសកល ព្រមទាំងជាផ្នែកមួយក្នុងការចូលរួមជាមួយរាជរដ្ឋាភិបាលអភិវឌ្ឍសង្គម-សេដ្ឋកិច្ចជាតិ។

ក្នុងទិវាជាតិសហគ្រាសធុនមីក្រូ តូច និងមធ្យមលើកទី២ នាថ្ងៃទី២៦ ខែមិថុនា ឆ្នាំ២០២៥ ឯកឧត្តម អូន ព័ន្ធមុនីរ័ត្ន ក៏ជំរុញឱ្យ MSMEs ត្រូវចូលរួមជាមួយរាជរដ្ឋាភិបាល តាមរយៈការកសាងសមត្ថភាពផ្ទៃក្នុងរបស់ខ្លួន ដើម្បីពង្រឹងអនុលោមភាព ការកែលម្អអភិបាលកិច្ចធុរកិច្ច ទៅតាមស្តង់ដា គុណភាព សុវត្ថិភាព អនាម័យ និងការទទួលខុសត្រូវចំពោះបរិស្ថាន។ រដ្ឋមន្ត្រីក្រសួងសេដ្ឋកិច្ច បន្តថា ការកសាងសមត្ថភាពរបស់ MSMEs មិនមែនត្រឹមតែជាការតម្រូវរបស់រាជរដ្ឋាភិបាលប៉ុណ្ណោះទេ ប៉ុន្តែជាការចង់បានរបស់អតិថិជន វិនិយោគិន និងទីផ្សារផងដែរ។

ទន្ទឹមនឹងនេះ ឯកឧត្តម អូន ព័ន្ធមុនីរ័ត្ន ក៏បានសង្ឃឹមថា កិច្ចពិភាក្សាលើប្រធានបទសំខាន់ៗ ក្នុងទិវាជាតិទិវាជាតិសហគ្រាសធុនមីក្រូ តូច និងមធ្យមលើកទី២ នឹងផ្តល់ជាមូលដ្ឋាន ព្រមទាំងជាធាតុចូលដ៏សំខាន់ ក្នុងកិច្ចខិតខំជំរុញការអភិវឌ្ឍសហគ្រាសធុន មីក្រូតូច និងមធ្យមនៅកម្ពុជា សំដៅត្រៀមលក្ខណៈឱ្យបានគ្រប់គ្រាន់ សម្រាប់ការចាកចេញរបស់កម្ពុជាពីចំណាត់ថ្នាក់នៃក្រុមប្រទេសអភិវឌ្ឍតិចតួច នាពេលខាងមុខ ក៏ដូចជារួមចំណែកដល់ការសម្រេចបាននូវចក្ខុវិស័យកម្ពុជាឆ្នាំ២០៥០ ក្នុងការប្រែក្លាយកម្ពុជាទៅជាប្រទេសមានចំណូលខ្ពស់៕