ភ្នំពេញ៖ ឯកឧត្តម ស៊ិន សារៀម ឯកអគ្គរាជទូតកម្ពុជាប្រចាំហ្វីលីពីន និងឯកឧត្តម Enrique A. Manalo រដ្ឋមន្ត្រីការបរទេសហ្វីលីពីន បានពិភាក្សាជំរុញការអនុវត្តប្រកបដោយប្រសិទ្ធភាពលើវិស័យពាណិជ្ជកម្ម វិនិយោគ កសិកម្ម ទេសចរណ៍ និងកម្លាំងពលកម្ម តាមរយៈអនុស្សរណៈនៃការយោគយល់គ្នា (MoU) មានស្រាប់ដែលបានចុះហត្ថលេខាសម្តេចធិបតី ហ៊ុន ម៉ាណែត ក្នុងអំឡុងទស្សនកិច្ចផ្លូវការនៅហ្វីលីពីន កាលពីខែកុម្ភៈ ឆ្នាំ២០២៥។

ក្នុងកិច្ចពិភាក្សាកាលថ្ងៃទី២០ ខែមិថុនា ឆ្នាំ២០២៥ នៅទីស្ដីការក្រសួងការបរទេសហ្វីលីពីន ភាគីទាំងពីរបានបញ្ជាក់ជាថ្មីនូវការប្តេជ្ញាចិត្តរួមគ្នាក្នុងការពន្លឿនការបញ្ចប់ដំណើរការចរចាលើឯកសារអនុស្សរណៈនៃការយោគយល់គ្នា (MoU) រួមមានវិស័យអប់រំថ្នាក់ឧត្តមសិក្សា សុខុមាលភាពនិងការងាររបស់ពលករចំណាកស្រុក និងកិច្ចសហប្រតិបត្តិការក្នុងការប្រយុទ្ធប្រឆាំងនឹងឧក្រិដ្ឋកម្មឆ្លងដែន។

ឯកសារទាំងនេះ គ្រោងចុះហត្ថលេខាក្នុងអំឡុងដំណើរទស្សនកិច្ចផ្លូវរដ្ឋរបស់ឯកឧត្តម Ferdinand R. Marcos Jr. ប្រធានាធិបតីនៃសាធារណរដ្ឋហ្វីលីពីននៅកម្ពុជានាចុងឆ្នាំ២០២៥នេះ។ បន្ថែមលើនេះ ភាគីទាំងពីរ ក៏បានផ្លាស់ប្តូរទស្សនៈក្នុងការបង្កើនការគាំទ្រគ្នាទៅវិញទៅមកក្នុងក្របខ័ណ្ឌអាស៊ាន និងអង្គការសហប្រជាជាតិផងដែរ។ នេះបើយោងតាមការចុះផ្សាយរបស់ស្ថានទូតកម្ពុជា ប្រចាំប្រទេសហ្វីលីពីន នាថ្ងៃទី២៣ ខែមិថុនា ឆ្នាំ២០២៥៕