ភ្នំពេញ៖ ការមកដល់តាមជើងហោះហើរត្រង់ និងផ្ទាល់ពីទីក្រុងអ៊ីស្តាន់ប៊ុលដែលស្ថិតលើទ្វីបអឺរ៉ុប និងអាស៊ីមកកាន់កម្ពុជាលើកដំបូង នឹងមកដល់នៅថ្ងៃទី១០ ខែធ្នូ ឆ្នាំ២០២៥ ដើម្បីផ្សព្វផ្សាយឱ្យទូលំទូលាយពីយុទ្ធនាការរដូវកាលបៃតងរបស់កម្ពុជា (Green Season) ដល់ប្រជាជនតួកគី និងបណ្តាប្រទេសម៉ូស្លីម។ នេះបើតាមការពិភាក្សារវាងឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ និងលោកជំទាវ ÜLKÜ KOCAEFE ឯកអគ្គរដ្ឋទូតវិសាមញ្ញនិងពេញសមត្ថភាពរបស់តួកគីយ៉េប្រចាំកម្ពុជា។

ក្នុងកិច្ចពិភាក្សា កាលពីថ្ងៃទី២០ ខែឧសភា ឆ្នាំ២០២៥ ឯកឧត្តម ហួត ហាក់ ក៏បានលើកឡើងពីការថតវីដេអូឃ្លីបជំរុញទេសចរណ៍រវាងកម្ពុជា និងតួកគី ដើម្បីទាក់ទាញទេសចរតួកគី និងអន្តរជាតិកាន់តែច្រើនមកទស្សនាកម្ពុជា។ ជាមួយគ្នានេះ ភាគីទាំងពីរ ក៏បានពិភាក្សាផ្តោតលើការរៀបចំផែនការអនុវត្តជាក់ស្តែងពីជំនួបនានាជាមួយភាគីតួកគីយ៉េនាអំឡុងទស្សនកិច្ចការងាររបស់ឯកឧត្តមរដ្ឋមន្រ្តីអំឡុងខែមេសាកន្លងមកផងដែរ។ នេះបើតាមការចុះផ្សាយរបស់ក្រសួងទេសចរណ៍ កាលពីថ្ងៃទី២០ ខែឧសភា ឆ្នាំ២០២៥៕