ភ្នំពេញ៖ គម្រោងវិនិយោគចំនួន១០ ក្នុងខេត្តព្រះសីហនុ ដែលមានទំហំវិនិយោគជាង ១៥៤លានដុល្លារ លើគម្រោងរោងចក្រកែច្នៃ, អគារពាណិជ្ជកម្ម, គ្រឹះស្ថានសិក្សាចំណេះទូទៅ, ផែបណ្តែតទឹក, សណ្ឋាគារ និងអគារស្នាក់នៅរួម ទទួលបានការលើកទឹកចិត្តពីរដ្ឋាភិបាលកម្ពុជា។ បើតាមការចុះផ្សាយរបស់រដ្ឋបាលខេត្តព្រះសីហនុ នាថ្ងៃទី២៩ ខែឧសភា ឆ្នាំ២០២៥ គម្រោងវិនិយោគចំនួន១០ នេះ អាចបង្កើតការងារប្រមាណ ១ ១៨៧កន្លែង។

ការលើកទឹកចិត្តពិសេសលើគម្រោងទាំង១០ នេះ មានដូចជា គម្រោងពាក់ព័ន្ធនឹងអគារជាប់គាំងចំនួន៤ , គម្រោងថ្មីចំនួន៤, គម្រោងពង្រីកចំនួន១ និងគម្រោងមានស្រាប់ចំនួន១ គម្រោង។ ក្នុងកិច្ចប្រជុំលើកទី១៦ របស់ក្រុមការងារជំរុញការវិនិយោគក្នុងខេត្តព្រះសីហនុ កាលពីថ្ងៃទី២៨ ខែឧសភា ឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានលើកឡើងថា ស្ថានភាពគោលនយោបាយពាណិជ្ជកម្មសកល និងការការពារឧស្សាហកម្មក្នុងស្រុក មានការកើនឡើងនៃរបាំងពាណិជ្ជកម្ម ក៏កម្ពុជានៅតែអាចទាក់ទាញវិនិយោគពីក្រៅប្រទេសបានផងដែរ។

ឯកឧត្តម ហ៊ាន សាហ៊ីប បានបន្តថា ក្រុមការងារជំរុញការវិនិយោគក្នុងខេត្តព្រះសីហនុ រួមទាំងភាគីពាក់ព័ន្ធ នឹងបន្តលើកកម្ពស់បរិយាកាសធុរកិច្ច សំដៅទាក់ទាញ និងជំរុញការវិនិយោគថែមទៀត មកកាន់ខេត្តព្រះសីហនុ តាមរយៈថែរក្សាអ្នកចាស់ និងស្វែងរកអ្នកថ្មី ហើយតាមការគ្រោងទុកនៅក្នុងខែមិថុនា ឆ្នាំ២០២៥ ខាងមុខក្រុមការងារជំរុញការវិនិយោគក្នុងខេត្តព្រះសីហនុ នឹងចុះពិនិត្យទីតាំងគម្រោងដែលស្នើការលើកទឹកចិត្ត ការអនុគ្រោះ និងការសម្រួលនីតិវិធីប្រមាណ៣០ គម្រោងបន្ថែមទៀត៕