ភ្នំពេញ៖ លោក YOSHIHISA Kainuma ប្រធាន និងជានាយកប្រតិបត្តិ នៃក្រុមហ៊ុន MinebeaMitsumi Inc., ដែលជាក្រុមហ៊ុន កំពុងបណ្តាក់ទុនវិនិយោគ និងពង្រីកប្រតិបត្តិការនៅកម្ពុជា លើកឡើងថា កម្ពុជា គឺជាគោលដៅដ៏ល្អបំផុតសម្រាប់ការវិនិយោគ។ នេះបើតាមការចុះផ្សាយរបស់ សម្តេចធិបតី ហ៊ុន ម៉ាណែត កាលពីថ្ងៃទី២៨ ខែឧសភា ឆ្នាំ២០២៥។

ក្នុងកិច្ចពិភាក្សា នាឱកាសសម្តេចធិបតី ហ៊ុន ម៉ាណែត បំពេញទស្សនកិច្ចការងារផ្លូវការ ពីថ្ងៃទី២៨-៣១ ខែឧសភា ឆ្នាំ២០២៥ នៅទីក្រុងតូក្យូ ប្រទេសជប៉ុន លោក YOSHIHISA Kainuma បានអរគុណរដ្ឋាភិបាលកម្ពុជា ដែលបានគាំទ្រដល់ដំណើរការ និងសកម្មភាពអាជីវកម្មរបស់ក្រុមហ៊ុន Minebea (Cambodia)។ លោក YOSHIHISA Kainuma លើកឡើងថា បច្ចុប្បន្ន ក្រុមហ៊ុនបានផ្តល់ឱកាសការងារ ជាង ២ពាន់កន្លែង និងគ្រោងជ្រើសរើសពលរដ្ឋបន្ថែមទៀតចូលធ្វើការជាបន្តបន្ទាប់។ លោក YOSHIHISA Kainuma ក៏បានបន្តលើកឡើងពីដំណើរការសាងសង់រោងចក្រថ្មីរបស់ក្រុមហ៊ុន ដែលគ្រោងនឹងបញ្ចប់នៅដំណាច់ឆ្នាំនេះ ដល់សម្តេចធិបតីនាយករដ្ឋមន្រ្តីផងដែរ។

សម្តេចធិបតី ហ៊ុន ម៉ាណែត មានប្រសាសន៍ថា ការពង្រីកប្រតិបត្តិការអាជីវកម្មជាបន្តបន្ទាប់របស់ក្រុមហ៊ុនមីនេបៀកម្ពុជា មិនត្រឹមតែបង្ហាញពីការរីកចម្រើនរបស់ក្រុមហ៊ុនប៉ុណ្ណោះទេ ប៉ុន្តែថែមទាំងបានចូលរួមយ៉ាងសំខាន់ក្នុងការបង្កើតការងារ និងលើកកម្ពស់ជីវភាពរបស់ប្រជាពលរដ្ឋកម្ពុជា។ សម្តេចបធិបតីនាយករដ្ឋមន្រ្តី ក៏បានគូសបញ្ជាក់អំពីការបន្តដាក់ចេញនូវគោលនយោបាយ ក្នុងការគាំទ្រ និងយកចិត្តទុកដាក់ចំពោះក្រុមហ៊ុនវិនិយោគទាំងអស់នៅកម្ពុជា ព្រមទាំងធានានូវបរិយាកាសវិនិយោគប្រកបដោយភាពទាក់ទាញ និងភាពប្រកួតប្រជែងសម្រាប់វិនិយោគិននៅកម្ពុជា៕