ភ្នំពេញ៖ ឯកឧត្តមរដ្ឋមន្ត្រីកសិកម្ម ឌិត ទីណា បានជួបប្រជុំជាមួយនឹងភាគីពាក់ព័ន្ធទាំងអស់ ដែលមានអ្នកចិញ្ចឹមសត្វ, អ្នកនាំចូល, កុងស៊ីឬអ្នកកាប់, អ្នកចែកចាយ និងអ្នកលក់ ដើម្បីឈានទៅដោះស្រាយបញ្ហាទីផ្សារសត្វ, សាច់ និងផលិតផលសត្វនៅកម្ពុជា។

ក្នុងកិច្ចប្រជុំដែលធ្វើឡើងនៅទីស្តីការក្រសួងកសិកម្ម នាថ្ងៃទី០៤ ខែមករា ឆ្នាំ២០២៤ ដើម្បីស្វែងយល់ពីស្ថានភាពពិតប្រាកដ និងគោលជំហររបស់ភាគីពាក់ព័ន្ធទាំងអស់ក្នុងវិស័យផលិតផលសត្វ។ ឯកឧត្តមរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានគូសបញ្ជាក់ថា ក្រសួងនឹងចាត់ចែងឱ្យមានការសិក្សាទីផ្សារគ្រប់ជ្រុងជ្រោយ ដើម្បីវាយតម្លៃឱ្យបានច្បាស់លាស់ពីស្ថានភាព, តម្រូវការ និងការផ្គត់ផ្គង់សត្វ ក្នុងខ្សែច្រវាក់ផលិតកម្ម និងតម្លៃ។

យន្តការសិក្សាទីផ្សារនេះ ឯកឧត្តម ឌិត ទីណា ថា ដើម្បីដោះស្រាយ និងគ្រប់គ្រងបញ្ហានេះឱ្យបានល្អប្រសើរ និងដើម្បីផលចំណេញទាំងអស់គ្នា ក៏ដូចជាសុខុមាលភាពសម្រាប់អ្នកបរិភោគផងដែរ៕