ភ្នំពេញ៖ ឯកឧត្តមបណ្ឌិត ធន់ វឌ្ឍនា អនុប្រធានទី២ព្រឹទ្ធសភា បានលើកឡើងថា កម្ពុជា-រុស្ស៊ី មានទំនាក់ទំនង ការទូតល្អ និងគួរពង្រឹងទំនាក់ទំនងសេដ្ឋកិច្ចបន្ថែមទៀត ក្នុងនោះក៏បញ្ជាក់ពីគំនិតផ្តួចផ្តើម និងទស្សនវិស័យមួយចំនួនជុំវិញវិស័យអប់រំ ទេសចរណ៍ កសិកម្ម សេដ្ឋកិច្ច និងការផ្លាស់ប្តូរទស្សនកិច្ចផ្លូវការរវាងថ្នាក់ដឹកនាំកម្ពុជា-រុស្ស៊ីផងដែរ។

ជាមួយគ្នានេះ ឯកឧត្តមបណ្ឌិត ធន់ វឌ្ឍនា និងឯកឧត្តម Anatoly Borovik អគ្គរដ្ឋទូតសហព័ន្ធរុស្ស៊ី ប្រចាំកម្ពុជា ក៏បានពិភាក្សាការបង្កើនអាហារូបករណ៍ដល់កម្ពុជា ការបង្កើនអ្នកទេសចររុស្ស៊ីមកកម្ពុជា ការវិនិយោគលើជីកសិកម្មជាដើម។ ឯកឧត្តមបណ្ឌិត ធន់ វឌ្ឍនា និងឯកឧត្តម Anatoly Borovik ក៏បានពិភាក្សាគ្នាអំពីវិធីសាស្រ្ត ដើម្បីជំរុញកិច្ចសហប្រតិបត្តិការរវាងប្រទេសទាំងពីរ ទាំងក្របខ័ណ្ឌសភា ទាំងវិស័យឯកជន។ នេះបើតាមការចុះផ្សាយរបស់ព្រឹទ្ធសភាកម្ពុជា នាថ្ងៃទី២០ ខែឧសភា ឆ្នាំ២០២៥៕