ភ្នំពេញ៖ ក្រុមហ៊ុនអាកាសចរណ៍កាតា នឹងបង្កើតកម្មវិធីប្រម៉ូសិនបញ្ចុះតម្លៃជើងហោះហើរចូលមកកម្ពុជា និងផ្សព្វផ្សាយពីគោលដៅទេសចរណ៍របស់កម្ពុជា អំឡុងពេលរដូវកាលបៃតង (Green Season) នៅលើយន្តហោះតាមរយៈសម្ភារ ដូចជា ទស្សនាវដ្ដី និងបណ្ណផ្នត់ ពិសេសផ្សព្វផ្សាយវីដេអូទេសចរណ៍ក្នុងជើងហោះហើរ។ នេះបើតាមការចុះផ្សាយរបស់ក្រសួងទេសចរណ៍ កាលពីថ្ងៃទី១៩ ខែឧសភា ឆ្នាំ២០២៥។

ជាមួយគ្នានេះ ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ និងលោក Boru Tilahun Ejetta អ្នកគ្រប់គ្រងតំបន់ឥណ្ឌូចិនក្រុមហ៊ុនអាកាសចរណ៍កាតា ក៏បានពិភាក្សាអំពីការតភ្ជាប់ជើងហោះហើរត្រង់រវាងកម្ពុជា-ក្រុមហ៊ុនអាកាសចរណ៍កាតា និងការផលិតវីដេអូផ្សព្វផ្សាយពីសក្តានុពលទេសចរណ៍របស់កម្ពុជាផងដែរ។

ទន្ទឹមនេះ ក្រុមហ៊ុន នឹងជួយផ្សព្វផ្សាយគោលដៅទេសចរណ៍សំខាន់ៗរបស់កម្ពុជា ពិសេសនៅខេត្តសៀមរាប ដើម្បីជំរុញលំហូរភ្ញៀវរវាងប្រទេសទាំងពីរ និងភ្ញៀវមកពីប្រទេសទីបី ព្រមទាំហសហការផលិតវីឌីអូខ្លីៗ អំពីរដូវកាលបៃតងនៅកម្ពុជា ក៏ដូចជាគោលដៅទេសចរណ៍ Muslim Friendly ផ្សព្វផ្សាយក្នុង Page ឬ Channel របស់ក្រុមហ៊ុន ផងដែរ៕