ភ្នំពេញ៖ វិទ្យាស្ថានជាតិវិទ្យាសាស្ត្រ បច្ចេកវិទ្យា និងនវានុវត្តន៍ (NISTI) រៀបចំកម្មវិធីបណ្ដុះបណ្ដាល ស្តីពី «វិធីសាស្រ្ដថែរក្សាគុណភាពអាហារសម្រាប់សហគ្រាសធុនមីក្រូ តូច និងមធ្យម (SMEs)» ដើម្បីផ្តល់ចំណេះដឹងផ្នែកបច្ចេកទេស និងវិធីសាស្រ្ដថែរក្សាម្ហូបអាហារ ព្រមទាំងពង្រឹងចំណេះដឹងអំពីសុវត្ថិភាព និងគុណភាពអាហារឱ្យកាន់តែប្រសើរ។

សិក្ខាកាម ដែលចូលរួមក្នុងវគ្គបណ្តុះបណ្តាលនេះ នឹងទទួលបានចំណេះដឹងលើវិធីសាស្ត្រថែរក្សាអាហារ ដោយប្រើប្រាស់កម្ដៅ ការសម្អាត ការបញ្ចុះសីតុណ្ហភាព និងការពង្រឹងចំណេះដឹងអំពីសុវត្ថិភាព និងគុណភាពអាហារឱ្យកាន់តែប្រសើរផងដែរ។ SMEs ដែលចូលរួមក្នុងវគ្គបណ្តុះបណ្តាលនេះបាន គឺត្រូវមានលក្ខខណ្ឌ ដូចជាត្រូវបានចាត់តាំងដោយសហគ្រាស, ធ្វើការ ឬមានបទពិសោធក្នុងផ្នែក R&D, Production, QA & QC និងចេះនិយាយ អាន និងសរសេរអក្សរខ្មែរ។

កម្មវិធីបណ្ដុះបណ្ដាល «វិធីសាស្រ្ដថែរក្សាគុណភាពអាហារ» នេះដែរ នឹងត្រូវធ្វើឡើងនៅថ្ងៃទី២៣ ខែឧសភា ឆ្នាំ២០២៥ ម៉ោង ៨:០០ - ១២:០០ថ្ងៃត្រង់ នៅវិទ្យាស្ថានជាតិវិទ្យាសាស្ត្រ បច្ចេកវិទ្យា និងនវានុវត្តន៍ រាជធានីភ្នំពេញ, អាគារ B ជាន់ទី១។ នេះបើតាមការចុះផ្សាយរបស់ វិទ្យាស្ថាន NISTI៕