ភ្នំពេញ៖ ធនាគារអភិវឌ្ឍន៍ជនបទ និងកសិកម្ម (ARDB) បានដាក់ឱ្យដំណើរការជាផ្លូវការនូវមជ្ឈមណ្ឌលស្រាវជ្រាវចំនួនពីរ ដែលមានមានតួនាទីផ្តល់ចំណេះដឹង ប្រមូលចងក្រង និងរក្សាទុកឯកសារ ព្រមទាំងសមិទ្ធផលសំខាន់ៗផ្តោតលើវិស័យកសិកម្ម វិស័យបៃតង។

មជ្ឈមណ្ឌលស្រាវជ្រាវចំនួន២ នេះ មានដូចជា៖ មជ្ឈមណ្ឌលអគ្គបណ្ឌិតសភាចារ្យ អូន ព័ន្ធមុនីរ័ត្ន សម្រាប់ការសិក្សាគោលនយោបាយ និងបណ្តុះបណ្តាល និងមជ្ឈមណ្ឌលឧត្តមភាពសម្រាប់ការសិក្សាស្រាវជ្រាវពីហិរញ្ញប្បទានបៃតង ចំពោះវិស័យកសិកម្មរបស់សមាគមឥណទានកសិកម្ម និងជនបទ អាស៊ី-ប៉ាស៊ីហ្វិក។

ការដាក់ឱ្យដំណើរការមជ្ឈមណ្ឌលស្រាវជ្រាវទាំងពីរ រួមទាំងបណ្ណាល័យ សារមន្ទីរ និងបណ្ណសារដ្ឋាន គឺឆ្លុះបញ្ចាំងពីការយកចិត្តទុកដាក់របស់ធនាគារ ARDB ក្នុងការចូលរួមអនុវត្តគោលនយោបាយរបស់ រាជរដ្ឋាភិបាល លើកកម្ពស់ចំណេះដឹង ការអភិវឌ្ឍមូលធនមនុស្ស, និងការជំរុញការអភិវឌ្ឍប្រកបដោយ ចីរភាព ទាំងនៅថ្នាក់ជាតិ និងថ្នាក់តំបន់។ ក្នុងពិធីសម្ពោធដាក់ឱ្យដំណើរការកាលពីថ្ងៃទី១៨ ខែមេសា ឆ្នាំ២០២៥ ក្រោមអធិបតីភាពរបស់ឯកឧត្តម រស់ សីលវ៉ា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ៕