ភ្នំពេញ៖ តំបន់ភូមិភាគឦសាន មានសក្តានុពលខ្ពស់ ជាពិសេសខាងវិស័យកសិកម្ម កសិឧស្សាហកម្ម និងទេសចរណ៍ ប៉ុន្តែខេត្តនីមួយៗ ហាក់បីដូចជាមិនទាន់អាចទាញយកឧត្តមប្រយោជន៍ពីសក្តានុពលទាំងនេះជាអតិបរមានៅឡើយ។ ចំពោះកត្តាឧបសគ្គ ដែលវិនិយោគិន និងភ្ញៀវទេសចរ ជួបប្រទះបញ្ហាប្រឈមចម្បងៗ មានដូចជាថ្លៃអគ្គិសនី មិនមានភាពប្រកួតប្រជែង, អត្រាការប្រាក់ខ្ពស់ និងកង្វះហេដ្ឋារចនាសម្ព័ន្ធតភ្ជាប់សំខាន់ៗ។

ក្រៅពីនេះ វិនិយោគិន និងភ្ញៀវទេសចរ ក៏ជួបបញ្ហាកង្វះពលកម្មជំនាញ, បរិមាណ និងគុណភាព, បញ្ហាចុះបញ្ចីដីធ្លី, បញ្ហាសម្បទានដីសេដ្ឋកិច្ចអសកម្ម, បញ្ហាគ្រប់គ្រងរបស់សហគមន៍ទេសចរណ៍ និងកង្វះការចូលរួមរបស់វិស័យឯកជនផងដែរ។ បច្ចុប្បន្ន ផលិតកម្មកែច្នៃផលិតផល-កសិឧស្សាហកម្ម នៅតំបន់ឦសាននេះ គឺនៅមានកម្រិត និងទ្រង់ទ្រាយតូច (Small scale) ហើយមានលក្ខណៈរាយប៉ាយ។

ពាក់ព័ន្ធនិងកសិផលសំខាន់ៗនៅតំបន់ខាងលើនេះ ពិសេសកៅស៊ូ ស្វាយចន្ទី ដំឡូងមី និងចេកអំបូងលឿង ដែលសុទ្ធសឹងជាដំណាំសក្តានុពលក្នុងបណ្តាខេត្តទាំងនេះ ស្ទើរតែទាំងអស់គឺត្រូវបាននាំចេញជាវត្ថុធាតុដើម (raw materials) ទៅប្រទេសជិតខាង ដែលធ្វើឱ្យបាត់បង់តម្លៃបន្ថែមក្នុងសេដ្ឋកិច្ច។ ក្រៅពីវិស័យកសិកម្ម និងកសិ-ឧស្សាហកម្ម តំបន់ទាំងនេះ ក៏មានលក្ខខណ្ឌអំណោយផលខ្ពស់លើវិស័យទេសចរណ៍ ប៉ុន្តែការវិនិយោគផ្នែកផ្គត់ផ្គង់ និងទំហំភ្ញៀវទេសចរ ផ្នែកតម្រូវការ ទៅទស្សនាបណ្តាខេត្តទាំងនេះនៅមានកម្រិតទាប៕

ប្រភពដកស្រង់ពីសៀវភៅ៖ កម្មវិធីពិសេសជំរុញការវិនិយោគក្នុងខេត្តទាំងបួននៅភូមិភាគឦសាន នៃព្រះរាជាណាចក្រកម្ពុជា ឆ្នាំ២០២៥-២០២៨