ភ្នំពេញ៖ ទីភ្នាក់ងារមូលនិធិរូបិយវត្ថុអន្តរជាតិ (IMF) ប្តេជ្ញាផ្តល់ជំនួយបច្ចេកទេសផ្សេងៗ ដើម្បីរួមចំណែកក្នុងការទាក់ទាញវិនិយោគបន្ថែមទៀតមកកម្ពុជា។ នេះជាការលើកឡើងរបស់លោក Kenichiro Kashiwase ជាប្រធានបេសកកម្មមកកម្ពុជា ដែលដឹកនាំក្រុមការងារទីភ្នាក់ងារ IMF កាលពីថ្ងៃទី០៧ ខែមេសា ឆ្នាំ២០២៧។

ក្នុងជំនួបនេះ ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា/ក្រុមប្រឹក្សាអភិវឌ្ឍន៍កម្ពុជា បានបញ្ជាក់ពីវឌ្ឍនភាពក្នុងការធ្វើពិពិធកម្មសេដ្ឋកិច្ច, យុទ្ធសាស្រ្តក្នុងការធ្វើពិពិធកម្មវិស័យឧស្សាហកម្ម, ការលើកទឹកចិត្តផ្នែកពន្ធ ការលើកទឹកចិត្តមិនមែនពន្ធ គោលនយោបាយឧស្សាហកម្ម, ការគ្រប់គ្រងតំបន់សេដ្ឋកិច្ចពិសេស និងការវិនិយោគផ្ទាល់ពីបរទេស (FDI)ផងដែរ។

លើសពីនេះ ឯកឧត្តម ជា វុទ្ធី ក៏បានលើកឡើងពីបទពិសោធជោគជ័យក្នុងការទាក់ទាញ FDI, ទស្សនវិស័យ និងតួនាទីយ៉ាងសំខាន់របស់ក្រុមប្រឹក្សាអភិវឌ្ឍន៍កម្ពុជា ក្នុងការចូលរួមស្ដារ និងជំរុញកំណើនសេដ្ឋកិច្ចរបស់កម្ពុជា និងគន្លឹះដែលនាំឱ្យកម្ពុជាទទួលបានកំណើន FDI ក្នុងឆ្នាំ២០២៤ និងបីខែដើមឆ្នាំ២០២៥ ពិសេសការទាក់ទាញវិនិយោគដោយចំគោលដៅ ដែលបានពាំនាំព័ត៌មានជាក់លាក់ ទៅដល់វិនិយោគិនដោយផ្ទាល់អំពីលក្ខណៈអំណោយផលសម្រាប់ការវិនិយោគនៅកម្ពុជា៕