ភ្នំពេញ៖ ក្រុមប្រឹក្សាអភិវឌ្ឍន៍កម្ពុជា(CDC) ចុះបញ្ជីគម្រោងវិនិយោគសរុបចំនួន ១៧២គម្រោង ក្នុងត្រីមាសទី១ នៃឆ្នាំ២០២៥ ដែលគម្រោងនេះ មានទុនវិនិយោគសរុបប្រមាណ ២,៥ពាន់លានដុល្លារ អាចបង្កើតឱកាសការងារបានចំនួនប្រមាណជិត ១២ម៉ឺនកន្លែង។ នេះបើតាមការចុះផ្សាយរបស់ក្រុមប្រឹក្សាអភិវឌ្ឍន៍កម្ពុជា នាថ្ងៃទី០៨ ខែមេសា ឆ្នាំ២០២៥។

ក្នុងចំណោមគម្រោងវិនិយោគសរុបចំនួន ១៧២នេះ មានគម្រោងវិនិយោគដែលមានទីតាំស្ថិតនៅក្រៅតំបន់សេដ្ឋកិច្ចពិសេសមានចំនួន ៩៩គម្រោង និងគម្រោងវិនិយោគដែលមានទីតាំងស្ថិតនៅក្នុងតំបន់សេដ្ឋកិច្ចពិសេសចំនួន ៧៣គម្រោង ក្នុងនោះគម្រោងពង្រីកផលិតកម្មមានចំនួន ៦គម្រោង។ CDC បានឱ្យដឹងថា ក្នុងត្រីមាសទី១ ឆ្នាំ២០២៥នេះ ការចុះបញ្ជីគម្រោងវិនិយោគមានការកើនឡើងចំនួន ៦៦គម្រោង ខណៈទុនវិនិយោគមានការកើនឡើងប្រមាណជាង ៣០៥លានដុល្លារ ស្មើនឹង ១៤% ធៀបនិងរយៈពេលដូចគ្នាក្នុងឆ្នាំ២០២៤។

ដោយឡែក នៅខែមីនា ក្រុមប្រឹក្សាអភិវឌ្ឍន៍កម្ពុជា បានចុះបញ្ជីគម្រោងវិនិយោគសរុបចំនួន ៦០គម្រោងក្នុងទុនវិនិយោគប្រមាណ ១,៤ពាន់លានដុល្លារ និងអាចបង្កើតការងារបានប្រមាណជិត ៥ម៉ឺនកន្លែង ក្នុងនោះគម្រោងពង្រីកផលិតកម្មមានចំនួន ២គម្រោង៕