ភ្នំពេញ៖ ទីភ្នាក់ងារបារាំងសម្រាប់អភិវឌ្ឍន៍ (AFD) បន្តពង្រឹងកិច្ចសហប្រតិបត្តិការនៅកម្ពុជា លើការអភិវឌ្ឍកម្លាំងជំនាញ ដើម្បីជំរុញកំណើនសេដ្ឋកិច្ចកម្ពុជា ឱ្យបានសម្រេចតាមគោលដៅ និងបន្តកិច្ចសហការជាមួយកម្ពុជា ក្នុងការដោះស្រាយបញ្ហាប្រឈមសម្រាប់ពេលអនាគត។ នេះបើតាមការបញ្ចាក់របស់លោកស្រី Sandrine Boucher នាយិកាទី AFD ក្នុងជំនួបជាមួយ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ។

ក្នុងជំនួបពិភាក្សា កាលពីថ្ងៃទី២ ខែមេសា ឆ្នាំ២០២៥ បានផ្តោតសំខាន់លើកិច្ចសហប្រតិបត្តិការលើការបណ្តុះបណ្តាលជំនាញបច្ចេកទេស និងវិជ្ជាជីវៈនៅកម្ពុជា ដោយក្នុងនោះ លោកស្រី Sandrine Boucher បានបញ្ជាក់ថា ការផ្តល់ការគាំទ្រដល់កម្ពុជា ដើម្បីអភិវឌ្ឍន៍កម្លាំងជំនាញ គឺជាវត្ថុបំណងដ៏ចម្បងមួយរបស់ទីភ្នាក់ងារបារាំងជាមួយរដ្ឋាភិបាលកម្ពុជា។ បើតាមការចុះផ្សាយរបស់ក្រសួងការងារ លោកស្រី Sandrine Boucher បានឱ្យដឹងថា AFD បាននិងកំពុងបន្តកិច្ចសហការជាមួយបណ្តាភាគីពាក់ព័ន្ធជាច្រើនឆ្នាំមកហើយ។

ឯកឧត្តម ហេង សួរ បានលើកឡើងថា ទីភ្នាក់ងារ AFD បាននិងកំពុងចូលរួមជាមួយកម្ពុជា ក្នុងការបណ្តុះបណ្តាលកម្លាំងជំនាញ ហើយកិច្ចសហប្រតិបត្តិការរវាងភាគីទាំងពីរ គឺមានសារសំខាន់ណាស់ក្នុងការឆ្លើយតបទៅនឹងបញ្ហាប្រឈម ដែលនឹងកើតឡើងនៅពេលអនាគត ពាក់ព័ន្ធនឹងការប្រកួតប្រជែងជាអន្តរជាតិ នៃទីផ្សារការងារ និងកម្លាំងជំនាញ។ បន្ថែមលើនេះ ឯកឧត្តម ហេង សួរ សង្ឃឹមថា ភាគីទាំងពីរ នឹងខិតខំស្វែងរកកិច្ចសហការថ្មីៗបន្ថែមទៀត ដើម្បីពង្រីកកម្លាំងជំនាញនៅកម្ពុជា ឱ្យកាន់តែប្រសើរឡើងក្នុងទិសដៅជំរុញសេដ្ឋកិច្ចជាតិ៕