ភ្នំពេញ៖ លោកស្រី Tania Meyer នាយិកាគ្រប់គ្រងការិយាល័យធនាគារពិភពលោក ប្រចាំនៅកម្ពុជា និងគណៈប្រតិភូ បានធ្វើបទបង្ហាញអំពីគម្រោងសិក្សាស្រាវជ្រាវប្រមូលទិន្ន័យ ដើម្បីរៀបចំបង្កើតកម្រងព័ត៌មានភស្តុភារកម្មកម្ពុជា (Logistic Dashboard) ក្នុងគោលដៅធ្វើឱ្យប្រសើរឡើងនូវប្រសិទ្ធភាព និងស័ក្តិសិទ្ធភាព និងសូចនាករនៅក្នុងប្រតិបត្តិការដឹកជញ្ជូន។

តាមរយៈជំនួបពិភាក្សា រវាង ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា និងលោកស្រី Tania Meyer កាលពីថ្ងៃទី០៣ ខែមីនា ឆ្នាំ២០២៥ បានឱ្យដឹងថា តាមការផ្តល់នូវទិដ្ឋភាពស៊ីជម្រៅ និងស្របតាមពេលវេលាជាក់ស្តែង នៃសូចនាករសំខាន់ៗទាំងនោះ វាអាចផ្តល់លទ្ធភាពដល់ភាគីពាក់ព័ន្ធក្នុងការគ្រប់គ្រងខ្សែចង្វាក់ផ្គត់ផ្គង់របស់ពួកគេយ៉ាងសកម្ម និងស្របតាមគោលបំណងអាជីវកម្មដែលរំពឹងទុក។

បើយោងតាមការចុះផ្សាយរបស់ក្រុមប្រឹក្សាអភិវឌ្ឍន៍កម្ពុជា នាថ្ងៃទី០៤ ខែមេសា ឆ្នាំ២០២៥ «កម្រងព័ត៌មានភស្តុភារកម្ម» គឺជាកម្រងឯកសារដ៏មានសារសំខាន់សម្រាប់ការបង្ហាញអំពីទិដ្ឋភាពស៊ីជម្រៅ នៃវិស័យភស្តុភារកម្ម សំដៅធ្វើឱ្យប្រសើរឡើងនូវប្រសិទ្ធភាព និងស័ក្តិសិទ្ធភាពក្នុងការសម្រេចចិត្តពីសំណាក់ភាគីពាក់ព័ន្ធក្នុងវិស័យនេះ ដោយផ្អែកលើទិន្នន័យ និងសូចនាករនានា នៅក្នុងប្រតិបត្តិការដឹកជញ្ជូន៕