ភ្នំពេញ៖ លោកស្រី Xu Xiaoxia អគ្គនាយិកាវិទ្យុមិត្តភាពកម្ពុជា-ចិន នៃអគ្គស្ថានីយវិទ្យុ និងទូរទស្សន៍មជ្ឈិមចិន សហការជាមួយក្រសួងទេសចរណ៍ រៀបចំកម្មវិធីផ្សព្វផ្សាយទេសចរណ៍កម្ពុជា-ចិន ក្នុងឆ្នាំថ្មីនេះ ដើម្បីទាក់ទាញដំណើរកម្សាន្តពីប្រជាជនចិន និងការបណ្តាក់ទុនវិនិយោគរបស់ធុរជនចិន មកកាន់កម្ពុជា។ នេះបើតាមការចុះផ្សាយរបស់ ក្រសួងទេសចរណ៍ កាលពីថ្ងៃទី៣ ខែមេសា ឆ្នាំ២០២៥។

លោកស្រី Xu Xiaoxia បានលើកឡើងពីវឌ្ឍនភាព នៃការរៀបចំកម្មវីធីថ្មីៗ ផ្សព្វផ្សាយពីសភាពការណ៍នយោបាយ សង្គម សន្តិសុខ ដែលមានសុខសន្តិភាពពេញបរិបូណ៍ និងល្អប្រសើរ ឱកាសវិនិយោគដ៏ល្អប្រពៃ និងគោលដៅទេសចរណ៍ដ៏សំបូរបែបនៅកម្ពុជា ឱ្យបានទូលំទូលាយទៅដល់ប្រជាជន និងធុរកិច្ចចិន ដើម្បីទាក់ទាញដំណើរកម្សាន្ត និងការវិនិយោគលើវិស័យទេសចរណ៍កាន់តែច្រើននៅក្នុងឆ្នាំនេះ។ លោកស្រី Xu Xiaoxia បញ្ជាក់ដូច្នេះ ក្នុងជំនួបពិភាក្សាការងារជាមួយ ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ កាលពីថ្ងៃទី៣ ខែមេសា ឆ្នាំ២០២៥៕