ភ្នំពេញ៖ ក្រសួងប្រៃសណីយ៍ និងទូរគមនាគមន៍ និងក្រសួងបច្ចេកវិទ្យានិងគមនាគមន៍ឡាវ (MTC) នឹងបន្តកិច្ចសហប្រតិបត្តិការយ៉ាងជិតស្និទ្ធ ដើម្បីជំរុញការធ្វើបរិវត្តកម្មឌីជីថលក្នុងតំបន់ និងការគាំទ្រយ៉ាងមុតមាំក្នុងការពង្រឹងភាពជាដៃគូ។ នេះបើតាមការចុះផ្សាយរបស់ក្រសួងប្រៃសណីយ៍ និងទូរគមនាគមន៍កាលនាថ្ងៃទី០២ ខែមេសា ឆ្នាំ២០២៥។

ក្នុងកម្មវិធី Lao Digital Week 2025 ឯកឧត្តមរដ្ឋមន្រ្តី MTC បានកោតសរសើរចំពោះថ្នាលឌីជីថលនានារបស់កម្ពុជា ដែលមានការរីកចម្រើន និងមានការវិវត្តយ៉ាងឆាប់រហ័ស ក្នុងនោះឯកឧត្តមរដ្ឋមន្រ្តី MTC ក៏បានស្នើឱ្យក្រសួងប្រៃសណីយ៍ និងទូរគមនាគមន៍កម្ពុជា ជួយណែនាំដល់ក្រុមហ៊ុននៅក្នុងប្រទេសឡាវឱ្យសហការ និងធ្វើជាដៃគូរជាមួយក្រុមហ៊ុននៅកម្ពុជាផងដែរ។

កម្មវិធីដែលធ្វើឡើងកាលពីថ្ងៃទី០២ ខែមេសា ឆ្នាំ២០២៥ នេះក៏មានការចូលរួមពីឯកឧត្តម សូ វិសុទ្ធី រដ្ឋលេខាធិការក្រសួងប្រៃសណីយ៍និងទូរគមនាគមន៍ (ក.ប.ទ.) និងគណៈប្រតិភូក្រុមហ៊ុនមួយចំនួនរួមមាន៖ ក្រុមហ៊ុន Vireak Buntham (VET Digital), CheckInME, PillTech, DelightTech, Morakot Technology, UDAYA Technology និង VTENH៕