ភ្នំពេញ៖ ពិព័រណ៍កសិកម្មជាប្រវត្តិសាស្ត្រដំបូងបង្អស់របស់កម្ពុជា ហៅកាត់ថា CAFE25 នឹងប្រព្រឹត្តទៅក្នុងរយៈពេល ២ថ្ងៃ ចាប់ពីថ្ងៃទី៧-៨ ខែមេសា ឆ្នាំ២០២៥ ដើម្បីឱ្យតួអង្គសំខាន់ៗមកពីចម្រុះមជ្ឈដ្ឋាន ពិភាក្សាកំណត់តម្រូវការវិនិយោគជាក់លាក់សម្រាប់ប្រភេទមុខទំនិញកសិផលចំនួន ៩ប្រភេទ ដូចជាស្រូវអង្ករ ស្វាយចន្ទី កៅស៊ូ ដំឡូងមី ស្វាយ វារីវប្បកម្ម ម្រេច និងផលិតផលឈើជាដើម ដើម្បីរៀបចំផែនការយុទ្ធសាស្ត្រសម្រាប់ការអនុវត្តបន្ត។

ពាក់ព័ន្ធនឹងការរៀបចំពិព័រណ៍នេះផងដែរ កាលពីថ្ងៃទី២ ខែមេសា ឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ជាមួយលោកជំទាវអនុរដ្ឋលេខាធិការ យ៉ើ អាស៊ីគីន ព្រមទាំងលោកជំទាវអនុរដ្ឋលេខាធិការ អ៊ឹម រចនា និងតំណាងអង្គការស្បៀង និងកសិកម្មនៃសហប្រជាជាតិ (FAO) បានចុះពិនិត្យទីតាំង ត្រៀមរៀបចំវេទិកានិងពិព័រណ៍កសិកម្មកម្ពុជា (CAFE25) នៅសណ្ឋាគារសាងគ្រីឡាភ្នំពេញ។

គួរបញ្ជាក់ថា វេទិកា និងពិព័រណ៍ CAFE25 នេះ នឹងប្រព្រឹត្តឡើង ក្រោមអធិបតីភាព ឯកឧត្តម ឌិត ទីណា រដ្ឋមន្ត្រី ក្រសួងកសិកម្ម និងមានការចូលរួមពីភ្ញៀវកិត្តិយស មន្ត្រីរាជរដ្ឋាភិបាល អ្នកតាក់តែងគោលនយោបាយ និងតំណាងមកពីវិស័យឯកជន សមាគមធុរកិច្ច វិនិយោគិន ស្ថាប័នហិរញ្ញវត្ថុ ស្ថានទូត អង្គការពាណិជ្ជកម្ម ដៃគូអភិវឌ្ឍន៍ អង្គការមិនមែនរដ្ឋាភិបាល សហគមន៍កសិកម្ម ស្ថាប័នស្រាវជ្រាវ និងផ្នែកសិក្សាធិការនានាប្រមាណ ៥០០នាក់។ នេះបើតាមការចុះផ្សាយរបស់ក្រសួងកសិកម្ម រុក្ខាប្រមាញ់ និងនេសាទ៕