ភ្នំពេញ៖ ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា (CDC) លើកទឹកចិត្តឱ្យក្រុមហ៊ុន តេ ហ្សង ស៊ីប៉ី បានស៊ី យ៉ានជីវ យ័ន ពិនិត្យលទ្ធភាពក្នុងការពង្រីកការវិនិយោគរបស់ខ្លួនបន្ថែមទៀត លើការនាំយកនូវបច្ចេកវិទ្យាចុងក្រោយមកកាន់កម្ពុជា ដើម្បីបណ្តុះបណ្តាល និងបំពាក់បំប៉នជំនាញបច្ចេកទេសដល់និយោជិតខ្មែរ។

ក្នុងពិធីសម្ពោធមជ្ឈមណ្ឌលរបស់ក្រុមហ៊ុន តេ ហ្សង ស៊ីប៉ី បានស៊ី យ៉ានជីវ យ័ន កាលពីថ្ងៃទី៣១ ខែមីនា ឆ្នាំ២០២៥ ឯកឧត្តម ជា វុទ្ធី បានអរគុណដល់ក្រុមហ៊ុនដែលបានជ្រើសរើសបណ្តាក់ទុនក្នុងការបង្កើតមជ្ឈមណ្ឌលត្រួតពិនិត្យឧបករណ៍ពិសេសនៅកម្ពុជា។ បន្ថែមលើនេះ ឯកឧត្តម ជា វុទ្ធី ក៏បានលើកទឹកចិត្ត ដល់វិនិយោគិនចិន បន្តចូលរួមផ្សព្វផ្សាយពីបទពិសោធល្អៗ ទៅកាន់វិនិយោគិនផ្សេងៗ ដើម្បីទាក់ទាញមកវិនិយោគនៅកម្ពុជាបន្ថែមទៀត ក្នុងការរួមចំណែកជាមួយនឹងកិច្ចខិតខំប្រឹងប្រែងរបស់រាជរដ្ឋាភិបាល។

ជាមួយគ្នានេះ លោក ហឺ ជីងវៃ ប្រធានមជ្ឈមណ្ឌលតេ ហ្សង ស៊ីប៉ី បានស៊ី យ៉ានជីវ យ័ន បានបញ្ជាក់ថា ក្រុមហ៊ុន នឹងសហការជាមួយស្ថាប័នធ្វើតេស្តឧបករណ៍ពិសេសឈានមុខគេរបស់ចិន ដើម្បីនាំចូលបច្ចេកវិទ្យាប្រព័ន្ធធ្វើតេស្តនិងឧបករណ៍ទំនើបៗមកកម្ពុជា។ លោក ហឺ ជីងវៃ បានបន្តថា ការបង្កើនស្តង់ដារការងារធ្វើតេស្តគ្រប់ប្រភេទរបស់មជ្ឈមណ្ឌល និងផ្តល់ការធានាដ៏រឹងមាំសម្រាប់ដំណើរការប្រកបដោយសុវត្ថិភាព និងស្ថិរភាពនៃឧបករណ៍ពិសេស៕