ភ្នំពេញ៖ ឯកឧត្ដម វ៉ា រុតសាន រដ្ឋលេខាធិការក្រសួងពាណិជ្ជកម្ម បានលើកឡើងថា «ការអភិវឌ្ឍប្រទេសកម្ពុជាឱ្យកាន់តែប្រសើរ៖នវានុវត្តន៍ និងបរិវត្តកម្មអាហារប្រកបដោយនិរន្តរភាព» នឹងបង្កើនការយល់ដឹងអំពីនវានុវត្តន៍វិស័យកសិ-ម្ហូបអាហារប្រកបដោយនិរន្តរភាព ពិសេសការច្នៃប្រឌិតកសិកម្ម។ នេះបើតាមការចុះផ្សាយរបស់ក្រសួងពាណិជ្ជកម្ម នាថ្ងៃទី៣១ ខែមីនា ឆ្នាំ២០២៥។

ក្នុងពិធីបើកនិងបិទសន្និបាតប្រចាំឆ្នាំលើកទី៥ ស្តីពីកសិ-អាហារប្រកបដោយនិរន្តរភាពនេះ ឯកឧត្ដម វ៉ា រុតសាន បានបន្ថែមថា កម្មវិធីនេះ នឹងដំណោះស្រាយពាណិជ្ជកម្ម, ការអនុវត្តកសិកម្មកកើតឡើងវិញ វិភាគនិន្នាការទីផ្សារ, សម្រួលដល់ការពង្រីកទីផ្សារក្នុងស្រុក និងអន្តរជាតិសម្រាប់ផលិតផលកសិកម្ម ពិសេសស្វែងយល់ពីធនធានហិរញ្ញវត្ថុ និងឱកាសវិនិយោគដែលគាំទ្រដល់កំណើននៃការរីកលូតលាស់ និងនិរន្តរភាពនៃវិស័យកសិម្ហូបអាហារ។

រដ្ឋលេខាធិការក្រសួងពាណិជ្ជកម្ម បានបន្តទៀតថា សន្និបាតកសិ-អាហារនេះ ក៏ធ្វើឡើងដើម្បីលើកកម្ពស់ការបញ្ជ្រាបគោលការណ៍សមភាពយេនឌ័រ ពិការភាព និងបរិយាបន្នសង្គម(GEDSI) ក្នុងខ្សែសង្វាក់ផ្គត់ផ្គង់កសិ-ម្ហូបអាហារ។ សន្និបាតនេះ ក៏បានកំណត់គំរូភាពជាដៃគូសាធារណៈ និងឯកជនប្រកបដោយប្រសិទ្ធភាព ដើម្បីបង្កើន សន្តិសុខស្បៀង និងលើកកម្ពស់ការអនុវត្តប្រកបដោយនិរន្តរភាព បើកការផ្គូផ្គងអាជីវកម្មនិងការចុះហត្ថលេខាលើកិច្ចសន្យាកសិកម្ម ដើម្បីជំរុញការអនុវត្តក្នុងភាពជាដៃគូផងដែរ៕