ភ្នំពេញ៖ រាជរដ្ឋាភិបាលកម្ពុជា បានចុះកិច្ចព្រមព្រៀងឥណទានសម្បទានជាមួយដៃគូអភិវឌ្ឍន៍នានា ក្នុងរយៈពេល៩ខែ ពីត្រីមាសទី១ ដល់ត្រីមាសទី៣ មានទំហំទឹកប្រាក់ចំនួន ១ពាន់លានដុល្លារអាម៉េរិក ដែលសមមូលនឹង ៧៦២,៥២លានអេសដេអ៊ែរ ស្មើ ៤៥ភាគរយ នៃពិតានដែលច្បាប់អនុញ្ញាត (១ ៧០០ លានអេសដេអ៊ែរ)។ ក្នុងនោះក្របខ័ណ្ឌទ្វេភាគីមានប្រមាណ ៤៥ភាគរយ និងក្របខ័ណ្ឌពហុភាគី ៥៥ ភាគរយ។

យោងតាមព្រឹត្ដិបត្រស្ថិតិបំណុលសាធារណៈកម្ពុជា ដែលចេញផ្សាយដោយក្រសួងសេដ្ឋកិច្ច និងហិរញ្ញវត្ថុ នាថ្ងៃទី០៧ ខែធ្នូ ឆ្នាំ២០២៣ បើធៀបនឹងរយៈពេលដូចគ្នាកាលពីឆ្នាំ២០២២ កិច្ចព្រមព្រៀងឥណទានសម្បទានថ្មី ក្នុង៣ត្រីមាសនៅឆ្នាំ២០២៣នេះ ថយចុះ១៧ភាគរយ។ ជារួមឥណទានទាំងនេះ សុទ្ធសឹងជាឥណទានមានកម្រិតសម្បទានខ្ពស់ ដោយមានធាតុអំណោយជាមធ្យមប្រមាណ ៤៣ភាគរយ។

ក្នុងព្រឹត្ដិបត្រស្ថិតិបំណុលសាធារណៈកម្ពុជា បានគូសបញ្ជាក់ថា រាជរដ្ឋាភិបាល បានទូទាត់សេវាបំណុលសរុបចំនួន ៤៣៧.៥៦លានដុល្លារ រួមមាន៖ ទី១. ក្របខ័ណ្ឌបំណុលសាធារណៈក្រៅប្រទេសមានចំនួនប្រមាណ ៤២៦.៦៨លានដុល្លារ ក្នុងនោះ ប្រាក់ដើម ៣២៨.៨៣លានដុល្លារ ការប្រាក់និងកម្រៃផ្សេងៗមាន ៩៧.៨៥លានដុល្លារ។ ទី២. ក្របខ័ណ្ឌបំណុលសាធារណៈក្នុងប្រទេស មានចំនួនប្រមាណ ១០.៨៨លានដុល្លារ ដោយមានប្រាក់ដើម ១០.១១លានដុល្លារ និងការប្រាក់ ០.៧៧លានដុល្លារ។ ចំនួននេះកើនឡើងប្រមាណ ៨ភាគរយ បើធៀបនឹងការទទូទាត់បំណុលសរុបចាប់ពីត្រីមាសទី១ ដល់ត្រីមាសទី៣ ឆ្នាំ២០២២។

គួរបញ្ជាក់ថា គោលដៅនៃការចុះកិច្ចព្រមព្រៀងឥណទានថ្មីទាំងនេះ គឺសម្រាប់បំពេញតម្រូវការហិរញ្ញប្បទានក្នុងវិស័យអាទិភាពរបស់រាជរដ្ឋាភិបាល ដើម្បីរួមចំណែកទ្រទ្រង់ចីរភាពនៃកំណើនរយៈពេលវែង និងបង្កើនផលិតភាពសេដ្ឋកិច្ច ឬផលិតភាពផលិតកម្ម៕