ភ្នំពេញ៖ ក្នុងឆ្នាំ២០២៤ កន្លងទៅ កម្ពុជា ផលិតបានអំបិលសរុបចំនួន ១៦៨,៨៨២តោន លើផ្ទៃដីស្រែអំបិលចំនួន ៣,៩៨៧,៣៥ហិកតា ដោយមានក្រុមផលិតចំនួន ១៩១ក្រុម ដែលក្នុងនោះ ខេត្តកំពត ផលិតលើស្រែអំបិល ៣,៤៨៩,៤៨ហិកតា បានអំបិល១២៨,៤៧៤តោន និងកែប ៤៩៧,៨៧ហិកតា ផលិតបាន ៤០,៤០៨តោន។

របាយការណ៍របស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានឱ្យដឹងថា សម្រាប់ឆ្នាំ២០២៤ កន្លងមកនេះ គឺពុំមានការនាំចូលអំបិលពីបរទេសទេ ហើយទិន្នផល ដែលបានលក់ចេញមាន ៧៤,១៨៥តោន ដោយមានសិប្បកម្មចំនួន ៣២មូលដ្ឋាន ក្នុងចំណោម ៥៤មូលដ្ឋាន ដែលទទួលបានអាជ្ញាបណ្ណ ប្រើប្រាស់ស្លាកសញ្ញាជាតិសម្គាល់អំបិល ដែលបានបញ្ចូលអ៊ីយ៉ូដ។ ដើម្បីដោះស្រាយបញ្ហាប្រឈម និងការចុះពិនិត្យផ្ទៃដីស្រែអំបិល និងផលិតកម្មអំបិល ក្រសួងឧស្សាហកម្មបានរៀបចំកិច្ចប្រជុំជាមួយផលិតករអំបិល និងសហគ្រាសមានសក្តានុពលនៅក្នុងខេត្តកំពត និងខេត្តកែបផងដែរ។

កិច្ចប្រជុំជាមួយភាគីពាក់ព័ន្ធខាងលើនេះ ធ្វើឡើងក្នុងគោលដៅសម្របសម្រួល ធ្វើបច្ចុប្បន្នភាព និងកំណត់អត្តសញ្ញាណប្រភេទដីស្រែអំបិលនៅខេត្តកំពត និងខេត្តកែបឱ្យបានច្បាស់លាស់ ហើយក្នុងនោះក្រសួងឧស្សាហកម្ម បានរៀបចំលិខិតទៅក្រសួងដែនដី នគរូបនីយកម្ម និងសំណង់ ដើម្បីសម្របសម្រួលនិងបានដាក់បញ្ចូលអាជ្ញាបណ្ណប្រើប្រាស់ស្លាកសញ្ញាជាតិសម្គាល់អំបិល ដែលបានបញ្ចូលជាតិអ៊ីយ៉ូដ ទៅក្នុងកម្រងកម្រៃសេវាសាធារណៈរបស់ក្រសួងផងដែរ៕