ភ្នំពេញ៖ ការអភិវឌ្ឍបច្ចេកវិទ្យាហិរញ្ញវត្ថុ បានរួមចំណែកជំរុញសន្ទុះនៃការអភិវឌ្ឍសេដ្ឋកិច្ច និងសង្គមឌីជីថលជាច្រើន ដូចជា៖ ការលើកកម្ពស់បរិយាបន្នហិរញ្ញវត្ថុ, បច្ចេកវិទ្យាហិរញ្ញវត្ថុ ដែលអាចទទួលបាននូវសេវាហិរញ្ញវត្ថុ, ជំរុញការប្រើប្រាស់សេវាហិរញ្ញវត្ថុ និងលើកកម្ពស់គុណភាពនៃសេវាហិរញ្ញវត្ថុកាន់តែប្រសើរ ជាមួយនឹងការកាត់បន្ថយការចំណាយ និងពេលវេលា។

តាមការចុះផ្សាយរបស់កម្ពុជាឆ្ពោះទៅឌីជីថល ការជំរុញនវានុវត្តន៍ហិរញ្ញវត្ថុ គឺទាមទារនូវការអភិវឌ្ឍបរិស្ថានសាកល្បងបច្ចេកវិទ្យាហិរញ្ញវត្ថុ (FinTech Regulatory Sandbox), ការធ្វើពិពិធកម្មសកម្មភាពបច្ចេកវិទ្យាហិរញ្ញវត្ថុ, ការជំរុញនវានុវត្តន៍ ឬធុរកិច្ចថ្មីបច្ចេកវិទ្យាហិរញ្ញវត្ថុ, ការបង្កើតមជ្ឈមណ្ឌល ឬមន្ទីរពិសោធន៍នវានុវត្តន៍បច្ចេកវិទ្យាហិរញ្ញវត្ថុ និងការផ្តួចផ្តើមគំនិតនវានុវត្តន៍បច្ចេកវិទ្យាហិរញ្ញវត្ថុផ្សេងទៀត។

ចំពោះ ការរក្សាស្ថិរភាពវិស័យហិរញ្ញវត្ថុ ក្នុងការរក្សាស្ថិរភាពវិស័យហិរញ្ញវត្ថុ បច្ចេកវិទ្យាហិរញ្ញវត្ថុបានជំរុញវិមជ្ឈការ និងការធ្វើពិពិធកម្មហិរញ្ញវត្ថុ, ការលើកកម្ពស់តម្លាភាព, ប្រសិទ្ធភាព និងសក្តិសិទ្ធិភាព នៃសេវាហិរញ្ញវត្ថុ និងការពង្រឹងអធិបតេយ្យភាពក្នុងវិស័យហិរញ្ញវត្ថុ តាមរយៈការប្រើប្រាស់បច្ចេកវិទ្យាគាំទ្រមួយចំនួន៕