ភ្នំពេញ៖ លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា ណែនាំមន្ត្រី-បុគ្គលិកសាខាខេត្តរតនគិរី ត្រៀមខ្លួនសហការធ្វើអង្កេតទំនុកចិត្តធុរកិច្ច (Business Confidence Survey) នៅខេត្តរតនគិរី ដើម្បីតាមដានស្ថានភាព នៃសកម្មភាពសេដ្ឋកិច្ចទាំងក្នុង និងក្រៅប្រព័ន្ធ។

ពិធីប្រកាសផ្ទេរ និងតែងតាំង នាយកសាខាធនាគារជាតិ ខេត្តរតនគិរី លោកជំទាវបណ្ឌិត ជា សិរី ក៏បានលើកទឹកចិត្តមន្ត្រី-បុគ្គលិកទាំងអស់ បន្តអភិវឌ្ឍន៍សមត្ថភាពជាប្រចាំ និងខិតខំបំពេញការងារប្រកបដោយការទទួលខុសត្រូវ ព្រមទាំងចូលរួមបង្កើនសកម្មភាព បញ្ជ្រាបចំណេះដឹងផ្នែកហិរញ្ញវត្ថុដល់ប្រជាជនក្នុងមូលដ្ឋាន ដើម្បីលើកកម្ពស់ការប្រើប្រាស់សេវាហិរញ្ញវត្ថុឱ្យកាន់តែមានប្រសិទ្ធភាពខ្ពស់។

ពាក់ព័ន្ធនឹងការផ្ទេរ និងតែងតាំង នាយកសាខាធនាគារជាតិ ខេត្តរតនគិរី លោកជំទាវបណ្ឌិត ជា សិរី មានប្រសាសន៍ថា ធ្វើឡើងក្នុងគោលបំណងបំពេញតម្រូវការរបស់ស្ថាប័ន តាមរយៈការនាំមកនូវជំនាញ និងបទពិសោធថ្មីបន្ថែមទៀត ដើម្បីបន្តនិរន្តរភាពការងារ និងប្រតិបត្តិការរបស់សាខា ឱ្យប្រព្រឹត្តទៅបានរលូននិងមានប្រសិទ្ធភាពខ្ពស់ថែមទៀត៕