ភ្នំពេញ៖ ស្ថាប័នការងារ អាចអភិវឌ្ឍន៍ទៅមុខបានរលូន ឬមិនរលូន មួយផ្នែកធំគឺត្រូវពឹងផ្នែកលើប្រសិទ្ធភាព នៃភាពជាអ្នកដឹកនាំរបស់ស្ថាប័ននោះ។ សហគ្រិនខ្មែរ បានលើកយកលក្ខណៈពិសេស នៃភាពជាអ្នកដឹកនាំ១ប្រភេទ មកបកស្រាយ នោះគឺភាពជាអ្នកដឹកនាំបែប Proactive ៖

១. ភាពជាអ្នកដឹកនាំបែប Proactive ជាវិធីនៃការដឹកនាំក្រុមដោយផ្ដោតលើការត្រៀមយុទ្ធសាស្រ្ដ មានផែនការជាក់លាក់ និងការគិតវិភាគបានស៊ីជម្រៅ ដើម្បីត្រៀមឆ្លើយតបនឹងបញ្ហាប្រឈម ដែលបម្រុងនឹងអាចកើតឡើងក្នុងប្រតិបត្តិការនីមួយៗ។ នៅពេលធ្វើការជាក្រុម អ្នកដឹកនាំបែប Proactive តែងចាប់ផ្ដើមដោយរៀបចំផែនការយុទ្ធសាស្រ្តដឹកនាំជាមុនសិន ដោយក្នុងនោះរួមបញ្ចូលទាំងវិធីសាស្រ្ដ និងរបៀបធ្វើការ ដើម្បីឱ្យការធ្វើការមានបែបផែន និងលំដាប់លំដោយល្អ។

អ្នកដឹកនាំបែប Proactive តែងតែគិត និងឈ្វេងយល់ជាមុន ថាតើដើរផ្លូវណា ឬប្រើវិធីសាស្រ្ដណា ដើម្បីឱ្យសកម្មភាពមួយដំណើរការបានរលូន ស្របជាមួយផែនការដោះស្រាយបញ្ហាសម្រាប់រយៈពេលខ្លី និងវែងមានរួចជាស្រេច។ អ្នកដឹកនាំបែប Proactive នឹងសម្រេចចិត្តអាស្រ័យលើការពិភាក្សាជាក្រុម និងភាពជាក់ស្ដែង ដូច្នេះប្រសិនបើក្រុមរបស់អ្នកមិនទាន់មានរចនាសម្ព័ន្ធជាក់លាក់ទេ ការដឹកនាំក្រុមបែប Proactive អាចជាជម្រើសល្អ ព្រោះវានឹងជួយអ្នកមានការត្រៀមខ្លួនទុកមុន៕