ភ្នំពេញ៖ មន្រ្តីជំនាញនាយកដ្ឋានឱសថ ចំណីអាហារ បរិក្ខារពេទ្យ និងគ្រឿងសម្អាង នៃក្រសួងសុខាភិបាល សហការជាមួយមន្ត្រីនៃមន្ទីរសុខាភិបាល, រដ្ឋបាលខេត្តកំពង់ចាម និងអាជ្ញាធរដែនដី ចុះបង្ក្រាបទីតាំងលក់ឱសថក្លែងក្លាយចំនួន៦មុខ តាមប្រព័ន្ធអនឡាញ ដែលស្ថិតនៅភូមិផ្អាវ ឃុំផ្អាវ ស្រុកបាធាយ ខេត្តកំពង់ចាម។ ឱសថដែលក្រសួងរកឃើញនោះ ធ្វើឱ្យប៉ះពាល់ធ្ងន់ធ្ងរដល់សុខភាព និងអាចឈានដល់បាត់បង់ជីវិតទៀតផង។ 

យោងតាមការចុះផ្សាយរបស់ក្រសួងសុខាភិបាល កាលពីថ្ងៃទី៣០ ខែវិច្ឆិកា ឆ្នាំ២០២៣ ឱសថក្លែងក្លាយទាំង៦មុខនោះ រួមមាន៖ NUTRIENT CALCIUM Tablet, NUTRIENT CALCIUM Capsule, NUTRIENT ANTACID Tablets, SYMPTOMS, CONSTIPAION និងថ្នាំបន្តក់ភ្នែក EYE PLUS ។ 

ក្នុងសេចក្តីប្រកាសព័ត៌មានដដែល លទ្ធផលវិភាគគុណភាពរបស់មជ្ឈមណ្ឌលជាតិពិសោធន៍សុខាភិបាល បានបញ្ជាក់ថា ឱសថ NUTRIENT CALCIUM Tablet មានផ្ទុកសារធាតុសកម្មឱសថ Diclofenac Sodium និងឱសថ NUTRIENT CALCIUM Capsule មានផ្ទុកសារធាតុសកម្មឱសថ Betamethasone ដែលប៉ះពាល់ធ្ងន់ធ្ងរដល់សុខភាព អាចឈានដល់បាត់បង់អាយុជីវិតអ្នកប្រើប្រាស់ក្នុងករណីប្រើប្រាស់រយៈពេលច្រើនខែ។

ដើម្បីធានាបាននូវសុវត្ថិភាពអ្នកប្រើប្រាស់ ក្រសួងសុខាភិបាល បានបញ្ជូនជនសង្ស័យដែលវេចខ្ចប់ និងលក់ឱសថក្លែងក្លាយទៅសាលាដំបូងខេត្តកំពង់ចាម ចាត់វិធានការតាមផ្លូវច្បាប់ និងប្រាប់ដល់សាធារណជនបញ្ឈប់ការទិញឱសថខាងលើ និងផលិតផលបំប៉នសុខភាព ឬអាហារបំប៉នសុខភាពគ្រប់ប្រភេទតាមបណ្តាញសង្គមដូចជា៖ Facebook, TikTok, Telegram និង Youtube ព្រោះឱសថ និងផលិតផលទាំងនោះ មិនអាចធានាបាននូវគុណភាព និងសុវត្ថិភាពទេ។ លើសពីនេះ ដើម្បីជៀសវាងការខាតបង់ថវិកាផ្ទាល់ខ្លួន និងប៉ះពាល់សុខភាព ក្រសួងសុខាភិបាល ឱ្យសាធារណជនទិញឱសថ និងផលិតផលបំប៉នសុខភាពដែលមានលេខទិដ្ឋាការ និងបញ្ជិកាពីក្រសួងនៅតាមឱសថស្ថាន និងឱសថស្ថានរងស្របច្បាប់៕