ភ្នំពេញ៖ លោកជំទាវ ចម និម្មល រដ្ឋមន្រ្តីក្រសួងពាណិជ្ជកម្ម លើកទឹកចិត្តឱ្យវិនិយោគិនអូស្រ្តាលីមកវិនិយោគក្នុងសួនឧស្សាហកម្មនៅកម្ពុជា។ លោកជំទាវ ចម និម្មល លើកឡើងដូច្នេះ ក្នុងជំនួបជាមួយលោកស្រី Robyn Mudie ឧបការីទី១ នៃលេខាធិការទទួលបន្ទុកតំបន់អាស៊ីអាគ្នេយ៍ និងដីគោក នៃក្រសួងការបរទេស និងពាណិជ្ជកម្មអូស្ត្រាលី។

ក្នុងឱកាសទទួលទានសាអាហារការងារ កាលពីថ្ងៃទី១៧ ខែកុម្ភៈ ឆ្នាំ២០២៥ លោកជំទាវ ចម និម្មល និងលោកស្រី Robyn Mudie ក៏បានពិភាក្សាលើប្រធានបទសំខាន់ៗ ដូចជាពាណិជ្ជកម្មទ្វេភាគី ឌីជីថលនីយកម្ម ការកសាងធនធានមនុស្ស អនាគតតំបន់ឥណ្ឌូប៉ាស៊ីហ្វិក និងសមភាពយេនឌ័រជាដើម។

ភាគីទាំងពីរ ក៏បានផ្លាស់ប្តូរយោបល់លើប្រធានបទមួយចំនួនទៀត មានបរិបទពាណិជ្ជកម្មសាកល ការធ្វើពិពិធកម្មទីផ្សារ តាមរយៈការទាញយកប្រយោជន៍ពីទីផ្សារអាស៊ាន និងអាសិប ដោយសង្កត់ធ្ងន់លើប្រព័ន្ធពាណិជ្ជកម្មពហុភាគីនិយម ដែលផ្អែកលើគោលការណ៍ច្បាប់ ដើម្បីកសាងទំនុកចិត្តដល់វិស័យធុរកិច្ចផងដែរ៕