ភ្នំពេញ៖ ឆ្នាំ២០២៥ រាជរដ្ឋាភិបាលកម្ពុជា គ្រោងបោះផ្សាយមូលបត្ររដ្ឋប្រមាណ ១២៣លានដុល្លារ សមមូលនឹងចំនួន ៥០០ប៊ីលានរៀល សម្រាប់ហិរញ្ញប្បទានលើចំណាយវិនិយោគ និងរក្សាតុល្យភាពថវិកាជាតិ។ ទន្ទឹមនេះ រាជរដ្ឋាភិបាលកំណត់ទំហំនៃការខ្ចីប្រាក់ពីដៃគូអភិវឌ្ឍន៍ប្រមាណ ២,៧ប៊ីលានដុល្លារអាម៉េរិក។

ការកើនឡើងទំហំ នៃការខ្ចីប្រាក់ពីដៃគូអភិវឌ្ឍន៍ធៀបនឹងឆ្នាំ២០២៤ គឺផ្អែកលើទិដ្ឋភាពចំនួន៥ រួមមាន៖ទី១. ទំហំនៃតម្រូវការវិនិយោគសាធារណៈ ដែលកម្ពុជាមានភាពចាំបាច់ក្នុងការកៀរគរធនធានបន្ថែម ដើម្បីបំពេញតម្រូវការសម្រាប់ជំរុញកំណើនសេដ្ឋកិច្ច ពិសេសជំនួសថវិកាគម្រោងវិនិយោគសាធារណៈដោយប្រភពចំណូលក្នុងប្រទេសដោយត្រូវធ្វើវិចារណកម្ម ដើម្បីបំពេញតម្រូវការចំណាយចរន្តក្នុងបរិការណ៍ដែលប្រភពចំណូលក្នុងប្រទេស និងសារពើពន្ធមាននិន្នាការថមថយ។

ចំពោះ ទី២. ឥណទានមានកម្រិតសម្បទានខ្ពស់, ទី៣. ស្ថានភាពបំណុលសាធារណៈកម្ពុជាបច្ចុប្បន្ន និងក្នុងរយៈពេលមធ្យមនៅតែមាន «ចីរភាព» និង «ហានិភ័យកម្រិតទាប», ទី៤. កម្មវិធីគម្រោងអភិវឌ្ឍន៍ដែលនឹងចុះកិច្ចព្រមព្រៀងឥណទានសម្បទានក្នុងឆ្នាំ២០២៥ ដែលជាកម្មវិធីគម្រោងវិនិយោគសាធារណៈក្នុងវិស័យអាទិភាព ដូចជាហេដ្ឋារចនាសម្ព័ន្ធរូបវន្ត ការបង្កើនផលិតភាពសេដ្ឋកិច្ច និងផលិតភាពផលិតកម្ម និងទី៥. ការបន្តបង្កើនប្រសិទ្ធភាពខ្ពស់ក្នុងការគ្រប់គ្រង និងអនុវត្តគម្រោង៕

ប្រភពពីសៀវភៅ៖ ថវិកាសង្ខេប ឆ្នាំ២០២៥