ភ្នំពេញ៖ ក្រុមហ៊ុន Excellent Associates Group Limited របស់ហ្វីលីពីន ចង់ស្វែងរកឱកាសវិនិយោគនៅកម្ពុជា លើសួនឧស្សាហកម្ម និងកសិ-ឧស្សាហកម្ម ព្រមទាំងកែច្នៃអង្ករសម្រាប់នាំចេញទៅទីផ្សារសំខាន់ៗមួយចំនួន ដូចជាហុងកុង ចិន និងទីផ្សារដទៃទៀត នាពេលអនាគត។ ក្រុមហ៊ុនមួយនេះ បញ្ជាក់ពីមូលហេតុថា អង្ករកម្ពុជា មានគុណភាពខ្ពស់ និងទទួលបានចំណាត់ថ្នាក់ល្អច្រើនឆ្នាំជាប់ៗគ្នា។

សម្ដេចធិបតី ហ៊ុន ម៉ាណែត ស្វាគមន៍ចំពោះ លោក Dai Jianlaing ប្រធានក្រុមហ៊ុន Excellent Associates Group Limited ដែលបានបង្ហាញចំណាប់អារម្មណ៍ស្វែងរកឱកាសវិនិយោគនៅកម្ពុជា។ ពាក់ព័ន្ធនឹងវិស័យកសិ-ឧស្សាហកម្ម សម្តេចបធិបតីនាយករដ្ឋមន្រ្តី បានលើកទឹកចិត្តឱ្យក្រុមហ៊ុន ពិចារណាវិនិយោគលើទំនិញកសិ-ឧស្សាហកម្មមួយចំនួនបន្ថែមទៀត ដើម្បីបំពេញតម្រូវការក្នុងច្រវាក់ផលិតកម្មនៃវិស័យកសិកម្ម ក៏ដូចជាការផលិតជីបែបធម្មជាតិ និងជីគីមីជាដើម។

នាដំណើរទស្សនកិច្ចផ្លូវការរបស់សម្តេចធិបតី ហ៊ុន ម៉ាណែត នៅទីក្រុងម៉ានីល ប្រទេសហ្វីលីពីន កាលពីថ្ងៃទី១០ ខែកុម្ភៈ ឆ្នាំ២០២៥ សម្ដេច ក៏បានបញ្ជាក់អំពីការដាក់ចេញនូវគោលនយោបាយ និងវិធានការរបស់រាជរដ្ឋាភិបាលកម្ពុជា ក្នុងការគាំទ្រដល់ការរៀបចំបង្កើតតំបន់សេដ្ឋកិច្ចពិសេសផងដែរ។ នេះបើតាមការចុះផ្សាយរបស់សម្ដេចធិបតី ហ៊ុន ម៉ាណែត៕