ភ្នំពេញ៖ ក្រុមហ៊ុន លីហ្វ៊ូដ (Lee's Food Service Ltd.) ដែលបានបើកដំណើរការតាំងពីឆ្នាំ២០១០ ហើយក៍ជាក្រុមហ៊ុននាំមុខគេមួយក្នុងចំណោមក្រុមហ៊ុនធំៗដែលនាំចូល និងចែកចាយក្នុងវិស័យម្ហូបអាហារ បានបង្ហាញអំពីគម្រោងក្នុងការវិនិយោគបង្កើតរោងចក្រផលិតសាច់មាន់នៅកម្ពុជា។ នេះបើតាមការចុះផ្សាយរបស់ធនាគារអភិវឌ្ឍន៍ជនបទ និងកសិកម្ម (ARDB) នាថ្ងៃទី០៤ ខែកុម្ភៈ ឆ្នា២០២៥។

ក្នុងជំនួបជាមួយឧកញ៉ា ច័ន្ទ តារា អគ្គនាយកក្រុមហ៊ុន លីហ្វ៊ូដ និង លោក ហ្គារេត តាន់ នាយកគ្រប់គ្រងទូទៅនៃក្រុមហ៊ុន លីហ្វ៊ូដ ឯកឧត្ដមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារ ARDB បានជំរុញឱ្យក្រុមហ៊ុន សហការផលិតជាមួយកសិដ្ឋានចិញ្ចឹមមាន់ក្នុងស្រុក និងផ្គត់ផ្គង់ជូនប្រជាពលរដ្ឋកម្ពុជានូវសាច់មាន់ប្រកបដោយគុណភាព អនាម័យ និងតម្លៃសមរម្យ។

ជាមួយគ្នានេះ ឯកឧត្ដមបណ្ឌិត កៅ ថាច ក៏បានបន្តថា ការសហការជាកសិដ្ឋានចិញ្ចឹមមាន់ក្នុងស្រុក អាចធ្វើឱ្យក្រុមហ៊ុនទទួលបានតម្លៃសមរម្យ នឹងអាចប្រកួតប្រជែងជាមួយប្រទេសជិតខាង ស្របតាមចក្ខុវិស័យរបស់ធនាគារ ARDB និងក្រោមគោលនយោបាយរបស់រាជរដ្ឋាភិបាលដែលផ្តោតសំខាន់ក្នុងការលើកកម្ពស់ផលិតផលកសិកម្មផងដែរ៕