ភ្នំពេញ៖ លោក Takuma Yatsui តំណាងក្រុមហ៊ុន Mitsui &Co. ប្រចាំប្រទេសចិន ចាប់អារម្មណ៍វិនិយោគផ្នែកកសិឧស្សាហកម្ម ជាពិសេសកែច្នៃគ្រាប់ស្វាយចន្ទី និងជ័រកៅស៊ូនៅកម្ពុជា។ ពាក់ព័ន្ធនឹងចំណាប់អារម្មណ៍នេះ លោក Takuma Yatsui បញ្ជាក់ថា ព្រោះកម្ពុជា ជាប្រទេសសក្តានុពលមួយក្នុងចំណោមបណ្តាប្រទេសនៅតំបន់អាស៊ីអាគ្នេយ៍ សម្រាប់អ្នកវិនិយោគជប៉ុនមកបណ្តាក់ទុនវិនិយោគ។

ក្នុងជំនួបជាមួយក្រុមការងារតុជប៉ុន និងក្រុមហ៊ុន Mitsui &Co. ឯកឧត្តម ឡោ ទិត្យច័ន្ទសុភក្តិ ទីប្រឹក្សាអមក្រុមប្រឹក្សាអភិវឌ្ឍន៍កម្ពុជា បានអរគុណក្រុមហ៊ុន Mitsui &Co. ដែលមកធ្វើទស្សនៈកិច្ចសិក្សា ដើម្បីស្វែងយល់ពីកាលានុវត្តភាព និងបរិយាកាសវិនិយោគរបស់កម្ពុជា។ ឯកឧត្តម ឡោ ទិត្យច័ន្ទសុភក្តិ ក៏បានបង្ហាញដោយសង្ខេបពីរចនាសម្ព័ន្ធគ្រប់គ្រងរបស់ក្រុមប្រឹក្សាអភិវឌ្ឍន៍កម្ពុជា ច្បាប់វិនិយោគ សក្តានុពលតាមវិស័យ និងវឌ្ឍនភាពនៃវិនិយោគជប៉ុននៅកម្ពុជា។ នេះបើតាមការចុះផ្សាយរបស់ ក្រុមប្រឹក្សាអភិវឌ្ឍន៍កម្ពុជា នាថ្ងៃទី២០ ខែមីនា ឆ្នាំ២០២៥៕