ភ្នំពេញ៖ ខែដំបូង ឆ្នាំ២០២៥ កម្ពុជាទទួលបានចំណូល ៦ ៩០៣ ៣៨០ដុល្លារ កើនឡើង២៥,៥៦% ពីការលក់បណ្ណចូលទស្សនារមណីយដ្ឋានអង្គរ, ប្រាសាទកោះកែរ និងកំពង់ផែចុងឃ្លៀស។ នេះបើតាមសេចក្ដីប្រកាសព័ត៌មាន ស្តីពីស្ថិតិភ្ញៀវទេសចរបរទេស ទិញបណ្ណចូលទស្សនារមណីយដ្ឋានអង្គរ ដែលគ្រឹះស្ថានអង្គរ ចេញផ្សាយនាថ្ងៃទី០១ ខែកុម្ភៈ ឆ្នាំ២០២៥។

ខែមករា នៃឆ្នាំ២០២៥នេះ ភ្ញៀវទេសចរបរទេស ទិញបណ្ណចូលទស្សនារមណីយដ្ឋានអង្គរ និងប្រាសាទកោះកែរ មានចំនួន ១៤៦ ១៤០នាក់ កើន២៦,៤៩% បើធៀបនឹងរយៈពេលដូចគ្នា នៅឆ្នាំ២០២៤។ ជាមួយគ្នានេះ រដ្ឋាភិបាលបានឧបត្ថម្ភមូលនិធិ នៃមន្ទីរពេទ្យគន្ធបុប្ផាកម្ពុជា ចំនួនសរុប ២៩២ ២៨០ដុល្លារ ពីចំណែកនៃការលក់បណ្ណ ជូនភ្ញៀវទេសចរបរទេស ចូលទស្សនារមណីយអង្គរ ដើម្បីជួយក្នុងមូលនិធិ សម្រាប់សង្គ្រោះជីវិតកុមារកម្ពុជា។

គ្រឹះស្ថានអង្គរ បានឱ្យដឹងថា ក្នុងខែមករានេះ ការលក់បណ្ណឱ្យភ្ញៀវទេសចរបរទេសចូលទស្សនាប្រាសាទកោះកែរ មានចំនួន ៦៨៩នាក់ ស្មើនឹង ៥៥ ៣៣៥ដុល្លារ។ ចំណែក ការលក់សំបុត្រទូកវិញ គ្រឹះស្ថានអង្គរទទួលបានចំណូល ១២០ ៧១៧ដុល្លារ ដែលមានទូកសរុបចំនួន ៤ ០៤៩ ក្នុងនោះទូកតូចចំនួន ២ ៦២៤, ទូកកណ្តាលចំនួន ១ ២២៤ និងទូកធំចំនួន ២០១៕