ភ្នំពេញ៖ និយ័តករមូលបត្រកម្ពុជា (ន.ម.ក.) និងសាជីវកម្មហិរញ្ញវត្ថុអន្តរជាតិ (IFC) បានចុះហត្ថលេខា(MOU) លើកិច្ចព្រមព្រៀងកិច្ចសហប្រតិបត្តិការ ដើម្បីគាំទ្រ ន.ម.ក. អភិវឌ្ឍន៍ទីផ្សារឧបករណ៍និស្សន្ទនៅកម្ពុជា។ នេះបើតាមសេចក្ដីប្រកាសព័ត៌មាន របស់ន.ម.ក. ចុះផ្សាយនាថ្ងៃទី០១ ខែកុម្ភៈ ឆ្នាំ២០២៥។

ក្នុងកម្មវិធី កាលពីថ្ងៃទី២២ ខែមករានេះ ឯកឧត្តម ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃ ន.ម.ក. បានលើកឡើងថា ទីផ្សារឧបករណ៍និស្សន្ទនៅកម្ពុជា គឺស្ថិតក្នុងដំណាក់កាលដំបូង ដែលទីផ្សារនេះ មានសក្តានុពលយ៉ាងធំដល់ការអភិវឌ្ឍហិរញ្ញវត្ថុជាតិ តាមរយៈការផ្ដល់នូវឧបករណ៍ហិរញ្ញវត្ថុប្រកបដោយនវានុវត្តន៍ ដែលគាំទ្រដល់ការគ្រប់គ្រងហានិភ័យ និងការធ្វើពិពិធកម្មនៃការវិនិយោគ។

ជាមួយគ្នានេះ លោក Tom Ceusters, ប្រធានទីផ្សារមូលធន និងការវិនិយោគ នៃ IFC បានបញ្ជាក់ថា ការបង្កើតទីផ្សារឧបករណ៍និស្សន្ទមួយប្រកបដោយប្រសិទ្ធភាព គឺពិតជាមានសារសំខាន់ណាស់សម្រាប់ការពង្រឹងស្ថិរភាពហិរញ្ញវត្ថុ ការគ្រប់គ្រងហានិភ័យ និងការជំរុញកំណើនសេដ្ឋកិច្ច។ ភាពជាដៃគូសហការនេះ គឺបានបញ្ជាក់ពីការប្តេជ្ញាចិត្តរួមគ្នា ក្នុងការបង្កើតហេដ្ឋារចនាសម្ព័ន្ធហិរញ្ញវត្ថុប្រកបដោយតម្លាភាព និងប្រសិទ្ធភាពដែលនឹងផ្តល់អត្ថប្រយោជន៍ដល់ វិនិយោគិន អាជីវកម្ម និងសេដ្ឋកិច្ចជារួម៕