ភ្នំពេញ៖ «ត្រីវិស័យ (TreyVisay)» កែណែថ្មី2.0.0 ជាកម្មវិធីទូរសព្ទដៃ(App) សម្រាប់ឱ្យសិស្សធ្វើស្វ័យវាយតម្លៃអំពីបុគ្គលិកលក្ខណៈ មុខរបរ ឈ្វេងយល់ព័ត៌មានអំពីមុខជំនាញសិក្សា ព័ត៌មានអាជីព គ្រឹះស្ថានឧត្ដមសិក្សា និងព័ត៌មានទីផ្សារការងារ ដើម្បីជួយដល់ការរៀបចំផែនការសិក្សា និងអាជីពការងារនាថ្ងៃអនាគតរបស់សិស្ស បានល្អប្រសើរ។

កម្មវិធីទូរសព្ទដៃ«ត្រីវិស័យ» ជាកម្មវិធីមួយដែលអនុញ្ញាតឱ្យសិស្សថ្នាក់ទី៩ ដល់ថ្នាក់ទី១២ អាចធ្វើការស្វែងយល់អំពីខ្លួនឯង ដោយតាមរយៈការធ្វើតេស្តជាមួយនឹងកម្មវិធីនេះ ដើម្បីអាចស្គាល់ពីជំនាញទន់, ជំនាញរឹង និងកំណត់គោលដៅរបស់ខ្លួន សម្រាប់ជ្រើសរើសជំនាញវិជ្ជាជីវៈនាពេលអនាគត។ មុខងារនៃកម្មវិធី«ត្រីវិស័យ (TreyVisay)» កំណែថ្មី2.0.0 មានដូចជាកម្មវិធីវាយតម្លៃមុខរបរ និងអាជីព, តេស្តភាពឆ្លាតវៃ, គ្រឹះស្ថានសិក្សា, ប្រភេទការងារ, វីដេអូមុខរបរ និងមជ្ឈមណ្ឌលការងារផងដែរ។

កម្មវិធី«ត្រីវិស័យ (TreyVisay)» បានបញ្ចូលនូវព័ត៌មានជាក់ទងជាមួយនឹងគ្រឹះស្ថានសិក្សាក្នុងស្រុក, ព័ត៌មានអំពីជំនាញដែលត្រូវសិក្សានៅសាកលវិទ្យាល័យ ក៏ដូចជាព័ត៌មានអំពីជំនាញវិជ្ជាជីវៈដោយមានភ្ជាប់ជាមួយនឹងសាលាវិជ្ជាជីវៈដែលអាចសិក្សាបានផងដែរ។ ក្រសួងអប់រំ យុវជន និងកីឡា បានឱ្យគ្រឹះស្ថានមធ្យមសិក្សាទាំងអស់ ចូលរួមផ្សព្វផ្សាយកម្មវិធីប្រឹក្សាតាមប្រព័ន្ធអេឡិចត្រូនិក App TreyVisay នេះដែលជាប្រយោជន៍ដល់យុវជន និងសិស្សនិស្សិតទាំងអស់។ ទាញយកកម្មវិធីត្រីវិស័យ៖ https://onelink.to/xrjebn ៕