ភ្នំពេញ៖ អគ្គកុងស៊ុលកម្ពុជាប្រចាំទីក្រុងក្វាងចូវ សាធារណរដ្ឋប្រជាមានិតចិន និងអគ្គកុងស៊ុលថៃឡង់ដ៍ប្រចាំទីក្រុងក្វាងចូវថ្មី ប្រទេសចិន នឹងបង្កើតកិច្ចសហការជំរុញវិស័យទេសចរណ៍ និងពាណិជ្ជកម្ម រវាងខេត្តក្វាងទុង ប្រទេសចិន ទៅកាន់បណ្តាខេត្តក្នុងប្រទេសជាសមាជិកក្នុងតំបន់អាស៊ាន។

ក្នុងជំនួប កាលពីថ្ងៃទី២៣ ខែមករា ឆ្នាំ២០២៥ ជាមួយ លោក ទុន ថុនា អគ្គកុងស៊ុលកម្ពុជាប្រចាំទីក្រុងក្វាងចូវ និង លោក ឡៅ ងួន អេង អនុព័ន្ធពាណិជ្ជកម្មអមស្ថានអគ្គកុងស៊ុល លោក KAJTITI WIWATWANONT អគ្គកុងស៊ុលថ្មីនៃប្រទេសថៃឡង់ដ៍ប្រចាំទីក្រុងក្វាងចូវ ក៏បានលើកឡើងពីកិច្ចការមួយចំនួន ដែលត្រូវសហការជាមួយកម្ពុជា រៀបចំធ្វើនៅឆ្នាំ២០២៥ នេះផងដែរ។

ឱកាសនោះ ភាគីកម្ពុជា ក៏បានអបអរសាទចំពោះស្ថានអគ្គកុងស៊ុលថៃឡង់ដ៍ដែលទទួលបានការគាំទ្រឱ្យធ្វើជាប្រធានប្តូរវេននៃស្ថានអគ្គកុងស៊ុលអាស៊ានប្រចាំទីក្រុងក្វាងចូវ ក្នុងខេត្តក្វាងទុង និង លោក KAJTITI WIWATWANONT ដែលត្រូវបានតែងតាំងអគ្គកុងស៊ុលថ្មីរបស់ថៃឡង់ដ៍ផងដែរ។ នេះបើតាមការចុះផ្សាយរបស់ក្រសួងពាណិជ្ជកម្ម នាថ្ងៃទី២៤ មករា៕