ភ្នំពេញ៖ រដ្ឋលេខធិការដ្ឋានអាកាសចរស៊ីវិល បានរៀបចំពិធីស្វាគមន៍អ្នកដំណើរចំនួន២០៨នាក់ ដែលបានមកកាន់អាកាសយានដ្ឋានអន្តរជាតិសៀមរាបអង្គរ(SAI) តាមរយៈជើងហោះហើរត្រង់ពីទីក្រុងស៊ីដនីយ៍ ប្រទេសអូស្ត្រាលី ដោយប្រើប្រាស់យន្តហោះធុនធំ(Wide-Body Aircraft) ប្រភេទ Boeing 777-200 នាយប់ថ្ងៃទី២៤ ខែវិច្ឆិកា ឆ្នាំ២០២៣។ ឯកឧត្តមបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល បានមកទទួលស្វាគមន៍អ្នកដំណើរមកកាន់ទឹកដីអង្គរដោយផ្ទាល់។

រដ្ឋលេខាធិការដ្ឋានអាកាសចរស៊ីវិល បានឱ្យដឹងនៅថ្ងៃទី២៤ វិច្ឆិកានេះថា ការរៀបចំពិធីស្វាគមន៍ជើងហោះហើរនេះ គឺបញ្ជាក់ពីលទ្ធភាព និងសមត្ថភាពគ្រប់គ្រាន់របស់អាកាសយានដ្ឋានអន្តរជាតិសៀមរាបអង្គរ ក្នុងការទទួលជើងហោះហើរត្រង់ពីតំបន់ឆ្ងាយៗ។ ជាក់ស្តែងដូចការចុះការចុះចតអាកាសយានធុនធំបានប្រភេទប៊ូអ៉ីង (Boeing) 777-200 ពីទីក្រុងស៊ីដនីយ៍ ប្រទេសអូស្ត្រាលី និងម្យ៉ាងទៀត បញ្ជាក់ពីការធានាបាននូវសន្តិសុខនិងសុវត្ថិភាពអាកាសចរណ៍ ដល់ក្រុមហ៊ុនអាកាសចរណ៍និងអ្នកដំណើរតាមផ្លូវអាកាសផងដែរ។

ក្នុងពិធីស្វាគមន៍អ្នកដំណើរទាំង២០៨នាក់ ដែលបានមកកាន់អាកាសយានដ្ឋានអន្តរជាតិសៀមរាបអង្គរ(SAI)នេះ ជាការរៀបចំទទួលតាមលក្ខណៈប្រពៃណីជាតិនិងអន្តរជាតិ ដូចជាការបាញ់ទឹកអបអរសាទរការមកដល់របស់អាកាសយាន, ការជូនបាច់ផ្កា និងក្រមាដល់អ្នកដំណើរតាមផ្លូវអាកាសទាំង២០៨នាក់ ជាដើម៕