ភ្នំពេញ៖ ក្រុមហ៊ុន 86Links Co., Ltd. ដែលមានជំនាញផ្តល់សេវារៀបចំថ្នាលបច្ចេកវិទ្យាឧស្សាហកម្មឌីជីថលនៅចិន ចង់សហការជាមួយក្រុមប្រឹក្សាអភិវឌ្ឍន៍កម្ពុជា (DCD) រៀបចំថ្នាលបច្ចេកវិទ្យាឌីជីថល ជួយទាក់ទាញការវិនិយោគមកកម្ពុជា តាមរយៈការផ្សព្វផ្សាយពីព័ត៌មានពាក់ព័ន្ធនឹងការវិនិយោគឱ្យកាន់តែទូលំទូលាយ។

លោក នាវ តាហុង (Niu Dahong) ប្រធានក្រុមហ៊ុន 86Links Co., Ltd. បញ្ជាក់ថា ថ្នាលបច្ចេកវិទ្យាឌីជីថល ដែលគ្រោងនឹងរៀបចំនៅកម្ពុជានេះ នឹងអាចតភ្ជាប់បណ្តាញព័ត៌មាន ឬទិន្នន័យនៃតំបន់សេដ្ឋកិច្ចពិសេស ក៏ដូចជាគម្រោងវិនិយោគក្នុងតំបន់សេដ្ឋកិច្ចពិសេសនៅកម្ពុជា។ ថ្នាលបច្ចេកវិទ្យានេះ ក៏អាចតភ្ជាប់ជាមួយថ្នាលព័ត៌មានរបស់ស្ថាប័នជំរុញវិនិយោគ និងពាណិជ្ជកម្មប្រទេសចិន និងបណ្តាប្រទេសផ្សេងៗទៀតនៅលើពិភពលោក ហើយដែលថ្នាលព័ត៌មានទាំងនោះ បាននិងកំពុងដើរតួនាទីយ៉ាងសំខាន់ក្នុងការស្វែងរកព័ត៌មាននានា ពីបណ្តាក្រុមហ៊ុនដែលមានបំណងទៅវិនិយោគនៅក្រៅប្រទេស។

ក្នុងជំនួបកាលពីថ្ងៃទី១៦ ខែមករា ឆ្នាំ២០២៥ ជាមួយ លោក នាវ តាហុង ឯកឧត្តម នុត អ៊ុនវ័ណរ៉ា អគ្គលេខាធិការរងគណៈកម្មាធិការវិនិយោគកម្ពុជា ក៏បានប្រាប់ពីបេសកកម្មរបស់ DCD ដែលមានតួនាទីជំរុញទាក់ទាញការវិនិយោគឯកជន និងការគ្រប់គ្រងតំបន់សេដ្ឋកិច្ចពិសេស។ បន្ថែមលើនេះ ឯកឧត្តម នុត អ៊ុនវ័ណរ៉ា ក៏បានលើកឡើងពីស្ថានភាពវិនិយោគនៅកម្ពុជា ច្បាប់ និងបទប្បញ្ញត្តិពាក់ព័ន្ធនឹងការវិនិយោគ និងរបបលើកទឹកចិត្តវិនិយោគ ដែលពោរពេញដោយភាពអំណោយផលផងដែរ៕