ភ្នំពេញ៖ សមាគមមីក្រូហិរញ្ញវត្ថុកម្ពុជា (CMA) សហការជាមួយសាជីវកម្មហិរញ្ញវត្ថុអន្តរជាតិ (International Financial Cooperation - IFC) នឹងបង្កើនការយល់ដឹង នងពង្រឹងការអនុវត្តក្នុងការប្រមូលឥណទានប្រកបដោយក្រមសីលធម៌ និងប្រសិទ្ធភាពក្នុងវិស័យមីក្រូហិរញ្ញវត្ថុ និងឥណទានខ្នាតតូចនៅកម្ពុជា។ នេះបើតាមការចុះផ្សាយរបស់ CMA កាលពីថ្ងៃទី២៤ ខែធ្នូ ឆ្នាំ២០២៤។

ក្នុងសិក្ខាសាលាអនឡាញ ស្តីពី «ការអនុវត្តការប្រមូលល្អក្នុងការផ្តល់ឥណទានខ្នាតតូច៖ តុល្យភាពគោលដៅអាជីវកម្មជាមួយនឹងសុចរិតភាព» កាលពីថ្ងៃទី២៣ ធ្នូនេះ មានគោលបំណងរក្សានូវតុល្យភាពគោលដៅអាជីវកម្មជាមួយនឹងកិច្ចការពារអតិថិជន ក៏ដូចជាជំរុញការផ្តល់ឥណទានប្រកបដោយនិរន្តរភាព និងទំនួលខុសត្រូវ។ សិក្ខាដដែលនេះ ក៏បានផ្តោតលើសារសំខាន់នៃការចាត់ទុកអតិថិជនថាជាដៃគូ ការជំរុញការជឿទុកចិត្ត និងការកំណត់អាទិភាពវិធីសាស្រ្តប្រមូលឥណទានប្រកបដោយក្រមសីលធម៌ដើម្បីគាំទ្រដល់វឌ្ឍនភាពសេដ្ឋកិច្ចផងដែរ។

គួរបញ្ជាក់ថា សិក្ខាសាលាដែលដឹកនាំដោយលោក សុខ វឿន អនុប្រធានក្រុមប្រឹក្សាភិបាល នៃCMA ដែលមានការចូលរួមពីលោក Jinchang Lai នាយកប្រតិបត្តិការនៃIFC បានពិភាក្សាទៅលើប្រធានបទសំខាន់ៗ រួមមាន៖ តួនាទីដ៏សំខាន់នៃការប្រមូលឥណទានខ្នាតតូចប្រកបដោយប្រសិទ្ធភាព, ការកំណត់ស្តង់ដារដ៏ល្អនៅក្នុងការប្រមូលឥណទានខ្នាតតូច, យុទ្ធសាស្ត្រអនុវត្តជោគជ័យនិងប្រមូលឥណទានប្រកបដោយក្រមសីលធម៌, ករណីសិក្សាលើការប្រមូលឥណទានល្អនឹងមិនបានល្អ និងចំណុចសំខាន់ៗផ្សេងៗទៀត៕