ភ្នំពេញ៖ ឯកឧត្តម ហាស់ សារ៉េត រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ណែនាំឱ្យរដ្ឋបាលជលផល និងភាគីពាក់ព័ន្ធ ពង្រឹងការងារវារីវប្បកម្ម ការងារសហគមន៍នេសាទ ការកែច្នៃ និងអភិរក្សជលផល ធនធានធម្មជាតិ ពង្រឹងការអនុវត្តច្បាប់ និងចុះបង្ក្រាបនិងទប់ស្កាត់បទល្មើសនេសាទជាប្រចាំ ដើម្បីប្រសិទ្ធភាព និងប្រសិទ្ធផលខ្ពស់ នាឆ្នាំ២០២៥។

ក្នុងកិច្ចប្រជុំបូកសរុបផលទ្ធផលការងារវិស័យជលផលឆ្នាំ២០២៤ និងលើកទិសដៅការងារសម្រាប់ឆ្នាំ២០២៥ ឯកឧត្តម ហាស់ សារ៉េត ណែនាំអង្គប្រជុំ ពិភាក្សាកំណត់បញ្ហាប្រឈម ដំណោះស្រាយ និងវិធានការគន្លឹះ ដើម្បីគ្រប់គ្រងអភិរក្ស និងអភិវឌ្ឍន៍ធនធានជលផលប្រកបដោយប្រសិទ្ធភាព។ ឯកឧត្តមរដ្ឋលេខាធិការកសិកម្ម បានឱ្យមន្ត្រីជំនាញផ្សព្វផ្សាយឱ្យបានទូលំទូលាយដល់ពលរដ្ឋក្នុងមូលដ្ឋានអំពីកន្លែងការពារ អភិរក្សជលផល និងបញ្ញតិពាក់ព័ន្ធនៃច្បាប់ជលផល ពង្រឹងការអនុវត្តច្បាប់ជលផលឱ្យបានម៉ឺងម៉ាត់ រួមទាំងប្រើប្រាស់កម្លាំង និងធនធានមនុស្សឱ្យអស់លទ្ធភាពក្នុងការអនុវត្តការងារឱ្យបានជោគជ័យថែមទៀត។

កិច្ចប្រជុំ ដែលធ្វើឡើងនាថ្ងៃទី២៤ ខែធ្នូ ឆ្នាំ២០២៤ នេះ មានការចូលរួមពីឯកឧត្តម លោកជំទាវ រដ្ឋលេខាធិការ អនុរដ្ឋលេខា ថ្នាក់ដឹកនាំក្រសួង ប្រធានរដ្ឋបាលជលផល អនុប្រធានរដ្ឋបាលជលផល ប្រធាន-អនុប្រធាននាយកដ្ឋាន ប្រធាន-អនុប្រធានមន្ទីរ នាយ-នាយរងខណ្ឌជលផល និងមន្ត្រីពាក់ព័ន្ធមួយចំនួនទៀតមកពី ២៥រាជធានីខេត្ត សរុបចំនួន៨៨នាក់៕