ភ្នំពេញ៖ ជប៉ុន បានផ្តល់ជំនួយរថយន្តប្រមូលសំរាមចំនួន១០ គ្រឿងបន្ថែមទៀតដល់កម្ពុជា សម្រាប់គម្រោងប្រើប្រាស់ឡើងវិញនូវរថយន្តដឹកសំរាមជប៉ុននៅក្រុង-ស្រុកចំនួន១០ ក្នុងខេត្តចំនួន៧។ ការផ្តល់ជំនួយរថយន្តចំនួន១០ គ្រឿងនេះ គឺជាកិច្ចព្រមព្រៀងផ្តល់ជំនួយឥតសំណងរវាងក្រសួងបរិស្ថាន និងស្ថានទូតជប៉ុនប្រចាំកម្ពុជា ដែលចុះហត្ថលេខាដោយឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន និងឯកឧត្តម អ៊ូអិណុ អាត់ស៊ូស៊ី ឯកអគ្គរាជទូតរបស់ជប៉ុនប្រចាំកម្ពុជា។

ក្នុងពិធីចុះហត្ថលេខា នាថ្ងៃទី២៣ ខែធ្នូ ឆ្នាំ២០២៤នេះ ឯកឧត្តមបណ្ដិត អ៊ាង សុផល្លែត បានលើកឡើងថា ការចុះកិច្ចព្រមព្រៀងនេះ ជាការបោះជំហានថ្មីមួយទៀត ក្នុងការរួមចំណែកលើកិច្ចគាំពារបរិស្ថាន ទាំងការគិតគូរលើការរៀបចំគោលនយោបាយឱ្យបានគ្រប់ជ្រុងជ្រោយ ការរួមគ្នាអនុវត្តឱ្យមានប្រសិទ្ធភាពខ្ពស់បន្ថែមទៀតលើការគ្រប់គ្រង សំរាម និងសំណល់រឹងនៅទីប្រជុំជន។

ជាមួយគ្នានេះ ឯកឧត្តម អ៊ូអិណុ អាត់ស៊ូស៊ី បានលើកឡើងថា គម្រោងរបស់ប្រទេសជប៉ុនខាងលើ ដែលបានផ្តល់រថយន្តដឹកសំរាម ដោយទីក្រុងអូសាកានេះ គឺរថយន្តអាចចល័តលើផ្លូវតូចៗ និងដឹកសំរាមបានច្រើន ដើម្បីជួយផ្តល់នូវបរិស្ថានស្អាតសម្រាប់ប្រជាជនកម្ពុជាបន្ថែមទៀត។ ទន្ទឹមនឹងនេះ ឯកឧត្តមបណ្ឌិត អ៊ាង សុផល្លែត បានបន្តថា កន្លងមកប្រទេសជប៉ុន បានផ្តល់រថយន្តដឹកសំរាមចំនួន ២០គ្រឿង ដែលបានបន្តប្រគល់ជូនទៅដល់រដ្ឋបាលក្រុង-ស្រុកគោលដៅ ដោយក្នុងឆ្នាំ២០២៤នេះ ជប៉ុន បានផ្តល់នូវរថយន្តចំនួន ១០បន្ថែមទៀត ដើម្បីសម្របសម្រួល និងបន្តប្រគល់ជូនដល់រដ្ឋបាលក្រុង-ស្រុកចំនួន៧ លើការពង្រឹងសេវាប្រមូល និងដឹកជញ្ជូនសំរាមទៅចាក់ចូលនៅទីលានឱ្យស្អាត និងទាន់ពេលវេលា។

តាមក្រសួងបរិស្ថានចេញផ្សាយនាថ្ងៃទី២៣ ខែធ្នូ ឆ្នាំ២០២៤ បានឱ្យដឹងថា ក្រសួង កំពុងនឹងរៀបចំផែនការសកម្មភាព«ការសម្អាតដងផ្លូវជាតិលេខ៣ លេខ៤ លេខ៤១ និងលេខ៥១» នៅក្នុងភូមិសាស្រ្តរាជធានីភ្នំពេញ ខេត្តកណ្តាល ខេត្តតាកែវ ខេត្តកំពង់ស្ពឺ ខេត្តកំពត ខេត្តកោះកុង និងខេត្តព្រះសីហនុ។ ផែនការសកម្មភាពនេះ កំពុងរៀបចំសម្អាតអនាម័យបរិស្ថាន រើសសំរាម ប្រមូលទុកដាក់ ដើម្បីឱ្យបណ្តាក្រុង ស្រុក ខណ្ឌនានា នៅតាមដងផ្លូវជាតិគោលដៅ មានភាពស្អាត មិនមានសំរាម និងសំណល់ប្លាស្ទិករាយប៉ាយនៅឆ្នាំ២០២៥៕