ភ្នំពេញ៖ ឯកឧត្តមបណ្ឌិតសភាចារ្យ ហ៊ាន សាហ៊ីប ប្រធានក្រុមការងារជំរុញការវិនិយោគក្នុងខេត្តព្រះសីហនុ និងលោក ឡុង ឌីម៉ង់ សមាជិកនៃក្រុមការងារជំរុញការវិនិយោគ ចុះពិនិត្យគម្រោងទទួលបានការលើកទឹកចិត្ត នៅទីតាំងចំនួន៣ ដែលមានទុនវិនិយោគប៉ាន់ស្មានសរុប ១,០៤០លានដុល្លារ ដើម្បីតាមដាន ជំរុញការអនុវត្តគម្រោង និងដោះស្រាយបញ្ហាប្រឈមនានាពីវិនិយោគិនដោយផ្ទាល់។

លោក ឡុង ឌីម៉ង់ លើកឡើងថា ការចុះពិនិត្យគម្រោងទាំងនេះ គឺជាភារកិច្ចសំខាន់ ដែលរដ្ឋបាលខេត្តក្នុងនាមជាអាជ្ញាធរមូលដ្ឋាន និងក្រុមការងារត្រូវបំពេញ និងកំពុងបន្តអនុវត្តជាប់ជាប្រចាំ។ បន្ថែមពីលើការទាក់ទាញការវិនិយោគ ភារកិច្ចសំខាន់មួយទៀត លោក ឡុង ឌីម៉ង់ ប្រាប់ថា គឺការស្វែងយល់អំពីបញ្ហាប្រឈមរបស់វិនិយោគិន ដើម្បីមានលទ្ធភាពផ្តល់ដំណោះស្រាយ និងការសម្របសម្រួលផ្សេងៗ រួមទាំងការពន្យល់នានា ដើម្បីជំរុញការអនុវត្តគម្រោងដោយរលូន និងបង្កើតបរិយាកាសវិនិយោគកាន់តែល្អប្រសើរ។

គម្រោងទាំង៣ ទទួលបានការលើកទឹកចិត្ត ការអនុគ្រោះ និងការសម្រួលនីតិវិធីក្រោមវិសាលភាព «កម្មវិធីពិសេសជំរុញការវិនិយោគក្នុងខេត្តព្រះសីហនុ ឆ្នាំ២០២៤» ដែលអាចបង្កើតការងារបានចំនួន ៥,៧៥៥កន្លែង នេះ មានដូចជា៖ ១. គម្រោងសណ្ឋាគារផ្កាយ៥ និងអគារពាណិជ្ជកម្ម (Peninsula Integrated Resort) របស់ក្រុមហ៊ុន Peninsula Bay Investment Co., Ltd, ២. គម្រោង រោងចក្រផលិតដែករបស់ក្រុមហ៊ុន HUALE STEEL (CAMBODIA) CO., LTD. និង៣. គម្រោងរោងចក្រផលិត និងផ្គុំដំឡើងបន្ទះសូឡា និងគ្រឿងបង្គុំរបស់ក្រុមហ៊ុន JINGYING PV-TECH (CAMBODIA) CO., LTD៕