ភ្នំពេញ៖ ឯកឧត្តម សោម ពិសិដ្ឋ រដ្ឋបាលខេត្តកែប ដាក់បម្រាមបញ្ឈប់សកម្មភាពផ្សព្វផ្សាយល្បែងស៊ីសងខុសច្បាប់នៅខេត្តកែប តាមសារាចរណែនាំរបស់ក្រសួងមហាផ្ទៃ ដើម្បីបញ្ឈប់សកម្មភាពផ្សព្វផ្សាយល្បែងស៊ីសងខុសច្បាប់ ឱ្យមានប្រសិទ្ធភាព ពិសេសពង្រឹងការអនុវត្តច្បាប់ និងធានាបាននូវសន្តិសុខសណ្តាប់ធ្នាប់សាធារណៈ និងសុវត្ថិភាពសង្គម។

បើតាមសេចក្តីណែនាំស្តីពី«ការបញ្ឈប់សកម្មភាពផ្សព្វផ្សាយល្បែងស៊ីសងខុសច្បាប់»នៅខេត្តកែប ដែលចេញផ្សាយកាលពីថ្ងៃទី១៧ ខែធ្នូ ឆ្នាំ២០២៤ អភិបាលខេត្តកែប ឱ្យមន្ត្រី និងភាគីពាក់ព័ន្ធ ពង្រឹងការអនុវត្តច្បាប់ និងធានាបាននូវសន្តិសុខសណ្តាប់ធ្នាប់សាធារណៈ និងសុវត្ថិភាពសង្គម ដោយហាមដាច់ខាតនូវការប្រើប្រាស់អាវយឺត ឬសម្ភារផ្សេងៗដែលមានបោះពុម្ពរូបភាពផេកកាស៊ីណូអនឡាញ ឬការលេងល្បែងស៊ីសងនៅក្នុងកម្មវិធីប្រគំតន្ត្រី និងកម្មវិធីកម្សាន្ត សប្បាយផ្សេងៗនៅខេត្តកែប។

ជាមួយគ្នានេះ មិនអនុញ្ញាតឱ្យក្រុមហ៊ុនផ្សព្វផ្សាយពាណិជ្ជកម្ម ផ្សព្វផ្សាយនូវរូបភាព ឬខ្លឹមសារពាក់ព័ន្ធនឹងល្បែងស៊ីសងខុសច្បាប់ លើផ្ទាំងបដាផ្សេងៗក្នុងខេត្ត ក្នុងនោះ រដ្ឋបាលខេត្ត ក៏ណែនាំឱ្យមន្ទីរព័ត៌មានខេត្ត ជំរុញបណ្តាញផ្សព្វផ្សាយនានាឱ្យផលិតវីដេអូ ដែលមានខ្លឹមសារផ្តល់ចំណេះដឹងពីផលប៉ះពាល់នៃការលេងល្បែងស៊ីសងខុសច្បាប់ ដើម្បីផ្សព្វផ្សាយដល់ប្រជាពលរដ្ឋឱ្យបានយល់ដឹងបន្ថែមពីបញ្ហានេះ។

ទន្ទឹមនឹងនេះ ស្នងការដ្ឋាននគរបាលខេត្តកែប និងភាគីពាក់ព័ន្ធ ត្រូវរៀបចំអនុវត្តនូវការងារមួយចំនួនរួមមាន៖ ត្រូវបន្តពង្រឹងអនុវត្តវិធានការទប់ស្កាត់ការលេងល្បែងស៊ីសងខុសច្បាប់គ្រប់ប្រភេទ, ត្រូវចាត់វិធានការក្នុងការតាមដានត្រួតពិនិត្យ និងហាមឃាត់ការផ្សព្វផ្សាយនូវរូបភាព ឬខ្លឹមសារពាក់ព័ន្ធនឹងល្បែងស៊ីសងខុសច្បាប់គ្រប់ប្រភេទ និងត្រូវផ្សព្វផ្សាយដល់ពលរដ្ឋក្នុងមូលដ្ឋានឱ្យយល់ដឹងពីហានិភ័យ និងផលប៉ះពាល់នៃការលេងល្បែងស៊ីសង៕