ភ្នំពេញ៖ វិនិយោគិនដែលមកចូលរួម«វេទិកាធុរកិច្ច និងវិនិយោគកម្ពុជា-កូរ៉េ (Cambodia-Korea Trade and Investment Forum)» នឹងស្វែងរកកាលានុវត្តភាពបណ្តាក់ទុនវិនិយោគនៅកម្ពុជា ក្រោមរូបភាពភាគហ៊ុនិក ឬដោយផ្ទាល់នាពេលខាងមុខ។ នេះជាការឡើងឡើងរបស់ឯកឧត្ដម សួន សុផល អគ្គលេខាធិការរងគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា (CDC)។

ថ្លែងក្នុងវេទិកាធុរកិច្ចនិងវិនិយោគនោះ ឯកឧត្ដម សួន សុផល បានលើកឡើងពីលក្ខណៈអំណោយផលរបស់កម្ពុជា លើការវិនិយោគគ្រប់វិស័យ រួមទាំងស្ថិរភាពនយោបាយ និងសេដ្ឋកិច្ច, ទីតាំងយុទ្ធសាស្រ្ត, កម្លាំងពលកម្មវ័យក្មេងប្រកបដោយផលិតភាព, អត្ថិភាពនៃរាជរដ្ឋាភិបាល ដែលមានទំនោរគាំទ្រដល់ធុរកិច្ច និងរបបវិនិយោគមានភាពអនុគ្រោះដល់ការធ្វើធុរកិច្ច តាមរយៈការផ្តល់កិច្ចសម្រួលវិនិយោគ និងកញ្ចប់លើកទឹកចិត្តឆ្លាតវៃ និងការថែទាំវិនិយោគប្រកបដោយភាពកក់ក្តៅ។

វេទិកានេះ អមដោយ«ពិព័រណ៌ពាណិជ្ជកម្មកម្ពុជា( CET )» ដែលត្រូវបានរៀបចំឡើងក្នុងគោលបំណងពង្រឹងការធ្វើពាណិជ្ជកម្ម និងការវិនិយោគទ្វេភាគីរវាងកម្ពុជា និងសាធារណរដ្ឋកូរ៉េ តាមរយៈការជំរុញភាពជាដៃគូពាណិជ្ជកម្មជាយុទ្ធសាស្រ្ត និងលើកកម្ពស់សក្ដានុពលវិនិយោគរបស់កម្ពុជា។ វេទិកា កាលពីថ្ងៃទី១៤ ខែធ្នូ ឆ្នាំ២០២៤ ធ្វើឡើងក្រោមអធិបតីភាពលោកជំទាវ ចម និម្មល រដ្ឋមន្រ្តី ក្រសួងពាណិជ្ជកម្មនៅមជ្ឈមណ្ឌល ភីអេច ហ្រ្គេនហល បុរី ប៉េងហួត បឹងស្នោ៕