ភ្នំពេញ៖ ម៉ាស៊ីនទិញសំបុត្រចូលទស្សនាអង្គរដោយស្វ័យប្រវត្តិ ត្រូវបានដាក់ឱ្យដំណើរជាផ្លូវការ ចាប់ពីថ្ងៃទី១២ ខែធ្នូ ឆ្នាំ២០២៤ តទៅ នៅក្នុងផ្សារហេរីថេកវ៉ក ជាន់ក្រោមដីទី១ (The Heritage Walk) ខេត្តសៀមរាប ដើម្បីឱ្យភ្ញៀវទេសចរអន្តរជាតិ អាចទិញសំបុត្រចូលទស្សនានៅតំបន់ប្រាសាទអង្គរបានកាន់តែងាយស្រួល។

តាមការចុះផ្សាយរបស់ The Heritage Walk ម៉ាស៊ីនទិញសំបុត្រចូលទស្សនាអង្គរដោយស្វ័យប្រវត្តិនេះ នឹងជួយសម្រួលការធ្វើដំណើរកម្សាន្តរបស់ភ្ញៀវទេសចរអន្តរជាតិ ដើម្បីស្វែងយល់ពីភាពអស្ចារ្យនៃរមណីយដ្ឋានតំបន់ប្រាសាទអង្គរវត្ត។ ភ្ញៀវទេសចរ នឹងទទួលបានអត្ថប្រយោជន៍ពីការប្រើប្រាស់ម៉ាស៊ីនទិញសំបុត្រនេះ ដូចជា មិនចាំបាច់តម្រង់ជួរយូរ, អាចទិញសំបុត្រទុកមុនពីល្ងាច សម្រាប់ការទស្សនាព្រះអាទិត្យរះបានយ៉ាងងាយស្រួល និងទីតាំងនៅកណ្តាលក្រុង ងាយស្រួលស្វែងរក និងចូលទៅទិញ។

ភ្ញៀវទេសចរអន្តរជាតិ អាចទិញសំបុត្រតាមម៉ាស៊ីនខាងលើនេះ ចាប់ពីម៉ោងផ្តល់សេវា គឺម៉ោង ៨:០០ព្រឹក ដល់ ៩:០០យប់ នៅផ្សារហេរីថេកវ៉ក ទីតាំង៖ https://maps.app.goo.gl/m56WXhoUGEHWzZdP9?g_st=com.google.maps.preview.copy ៕