ភ្នំពេញ៖ អង្ករ ម្រេច ស្វាយចន្ទី វត្ថុអនុស្សាវរីយ៍ គ្រឿងឧបភោគបរិភោគមួយចំនួន ជាពិសេសក្រមាខ្មែរ ដែលផលិតផលសក្តានុពល ត្រូវបានតាំងបង្ហាញនៅក្នុងទិវាអាស៊ាន (ASEAN Day) ដែលសហការរៀបចំដោយគណៈកម្មាធិការអាស៊ាន-អង់ការ៉ា និងសាកលវិទ្យាល័យ Ankara Haci Bayrum Veli នៅទីក្រុងអង់ការ៉ា ប្រទេសតួកគីយ៉េ នាថ្ងៃទី៥ ខែធ្នូ ឆ្នាំ២០២៤។ នេះបើតាមការចុះផ្សាយរបស់ក្រសួងពាណិជ្ជកម្ម នាថ្ងៃទី០៧ ខែធ្នូ ឆ្នាំ២០២៤។

ក្នុងទិវាអាស៊ាន ដែលមានក្រសួង-ស្ថាប័ននានា ស្ថានទូតបរទេស និងសាធារណជនចូលរួមប្រមាណ ៥០០នាក់នេះ លោក កែវ ប៊ុនថេង អនុព័ន្ធពាណិជ្ជកម្មប្រចាំប្រទេសតួកគីយ៉េ ក៏បានពន្យល់អំពីលក្ខណៈពិសេសនៃផលិតផល ការផលិតនិងការវេចខ្ចប់ និងសក្តានុពលទីផ្សាររបស់ផលិតផលកម្ពុជា ក៏ដូចជាបានចែករំលែកនូវព័ត៌មានទំនាក់ទំនងក្រុមហ៊ុន និងសហគ្រាសដល់អ្នកទស្សនាផងដែរ។

ក្នុងឱកាសនោះ លោក កែវ ប៊ុនថេង បានលើកឡើងថា ក្នុងទិវាអាស៊ាននេះ ស្ថានទូតកម្ពុជាប្រចាំប្រទេសតួកគីយ៉េ ក៏មានការរៀបចំនូវម្ហូបចំនួន ២មុខ គឺញ៉ាំមីសួរ និងឆាត្រប់ ដែលមាននៅក្នុងសៀវភៅមុខម្ហូបរសជាតិអង្គរ (The Taste of Angkor) ដើម្បីផ្តល់ជូនអ្នកចូលរួមពិសារផងដែរ៕