ភ្នំពេញ៖ ឯកឧត្តមរដ្ឋមន្ដ្រី ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ជំរុញឱ្យក្រុមការងារជំនាញកសិកម្ម ផ្តោតលើការធ្វើស្តង់ដារកសិផលមួយមុខ ឬពីរមុខឱ្យចំគោលដៅ មានលទ្ធផលល្អ ស្តង់ដារជាក់លាក់ មានការទទួលស្គាល់ និងអាចផ្សព្វផ្សាយពីគុណភាព រសជាតិ និងទំហំ ជាជាងផ្តោតលើបរិមាណនៃការធ្វើស្តង់ដារកសិផលច្រើន។

ក្នុងកិច្ចប្រជុំ ស្តីពីការរៀបចំផែនការតម្រូវការអភិវឌ្ឍន៍ស្តង់ដារកម្ពុជាលើវិស័យពាក់ព័ន្ធ និងថវិកាគាំទ្រចាំបាច់សម្រាប់ ឆ្នាំ២០២៥-២០៣០ ឯកឧត្តមរដ្ឋមន្ដ្រី ឌិត ទីណា បានណែនាំឱ្យអង្គប្រជុំត្រៀមធ្វើស្តង់ដារមួយ ដែលមានសុវត្ថិភាព និងគុណភាពខ្ពស់ ដោយអាស្រ័យលើទំនិញសក្តានុពលជាក់ស្តែង ដើម្បីជួយដល់ការផលិតរបស់កសិករប្រចាំថ្ងៃ និងលើកកម្ពស់ជីវភាពកសិករឱ្យមានភាពប្រសើរឡើង។

ក្នុងកិច្ចប្រជុំ កាលពីថ្ងៃទី០៥ ខែធ្នូ ឆ្នាំ២០២៤ នេះដែរ ឯកឧត្តម ឌិត ទីណា បានគូសបញ្ជាក់ឱ្យក្រុមការងារជំនាញកសិកម្ម ត្រូវពិនិត្យមើលពីតម្រូវការចាំបាច់ និងប្រើប្រាស់ស្តង់ដារដែលបង្កើតឡើងនេះ ឱ្យមានភាពជាក់លាក់ និងមានប្រយោជន៍ មានយន្តការច្បាស់លាស់ និងបម្រើដល់ការប្រកួតប្រជែងនៅលើទីផ្សារពិតប្រាកដ។ នេះបើតាមការចុះផ្សាយរបស់ក្រសួងកសិកម្ម នាថ្ងៃទី៦ ខែធ្នូ ឆ្នាំ២០២៤៕