ភ្នំពេញ៖ កម្ពុជា-ឡាវ ចុះហត្ថលេខា (MOU) លើកិច្ចព្រមព្រៀងស្ដីពី ការលុបបំបាត់ការយកពន្ធត្រួតគ្នា ពាក់ព័ន្ធនឹងពន្ធលើប្រាក់ចំណូល, ការបង្ការការគេចវេះពន្ធ និងការចៀសវាងពន្ធ។ ការចុះ MOU នេះ ធ្វើឡើងក្នុងជំនួបពិភាក្សាទ្វេភាគីរវាងសម្ដេចធិបតី ហ៊ុន ម៉ាណែត និងឯកឧត្តមបណ្ឌិត សនសៃ ស៊ីផាន់ដន នាយករដ្ឋមន្ត្រីនៃប្រទេសឡាវ នាថ្ងៃទី០៤ ខែធ្នូ ឆ្នាំ២០២៤។

ក្នុងជំនួបកិច្ចពិភាក្សានេះ សម្តេចធិបតី ហ៊ុន ម៉ាណែត និងឯកឧត្តមបណ្ឌិត សនសៃ ស៊ីផាន់ដន ក៏បានចុះ MOU ចំនួន ២ផ្សេងទៀតគឺ MOU ស្ដីពីកិច្ចសហប្រតិបត្តិការលើវិស័យកសិកម្ម និងកិច្ចហប្រតិបត្តិការលើវិស័យវប្បធម៌ និងសិល្បៈ។ ជាមួយគ្នានេះ ប្រមុខរដ្ឋាភិបាលទាំងពីរ ក៏បានឯកភាពបន្តពង្រឹង និងពង្រីកកិច្ចសហការលើវិស័យសំខាន់ៗរួមមានជាអាទិ៍៖ វិស័យនយោបាយ និងការទូត,សេដ្ឋកិច្ច, ពាណិជ្ជកម្ម, វិនិយោគ និងហិរញ្ញវត្ថុ, ការពារជាតិ និងសន្តិសុខ, ថាមពល, ការដឹកជញ្ជូននិងការតភ្ជាប់ហេដ្ឋារចនាសម្ព័ន្ធ, អប់រំ, ទេសចរណ៍, វប្បធម៌ និងសិល្ប:, កិច្ចសហការក្នុងក្របខ័ណ្ឌតំបន់ និងអន្តរជាតិ។

ភាគីទាំងពីរ ក៏បានលើកទឹកចិត្តឱ្យក្រសួង-ស្ថាប័នពាក់ព័ន្ធនៃប្រទេសទាំងពីរ បន្តជំរុញការពង្រឹងកិច្ចសហប្រតិបត្តិការ ឱ្យកាន់តែរឹងមាំ និងជិតស្និទថែមទៀត និងគាំទ្រឱ្យមានការផ្លាស់ប្ដូរដំណើរទស្សនកិច្ចរវាងគណៈប្រតិភូនៅគ្រប់កម្រិត រួមទាំងយុវជន និងយុវជនផងដែរ៕