ភ្នំពេញ៖ ក្រុមហ៊ុនវិនិយោគឧស្សាហកម្មធុនធ្ងន់ផ្នែកកែច្នៃដែកគ្រប់ប្រភេទ នៅខេត្តព្រះសីហនុ ដែលមានទុនវិនិយោគ ៤០លានដុល្លារ ទទួលបានការលើកទឹកចិត្ត និងអត្ថប្រយោជន៍ពិសេសពីរាជរដ្ឋាភិបាល។ តាមការចុះផ្សាយរបស់សម្តេចធិបតី ហ៊ុន ម៉ាណែត នាថ្ងៃទី០៣ ខែធ្នូ ឆ្នាំ២០២៤ គម្រោងវិនិយោគបង្កើតរោងចក្រផលិតដែកនេះ មានសកម្មភាពអាជីវកម្ម រួមមាន៖ ការពន្លា, ការច្រៀកដែកសន្លឹក និងដែករនាប ដើម្បីកែច្នៃសម្រាប់បម្រើការក្នុងវិស័យសំណង់។

ជាមួយគ្នានេះ ក្រុមការងារជំរុញការវិនិយោគក្នុងខេត្តព្រះសីហនុ ដែលដឹកនាំដោយឯកឧត្តមបណ្ឌិតសភាចារ្យ ហ៊ាន សាហ៊ីប ទីប្រឹក្សាសម្តេចធិបតីនាយករដ្ឋមន្រ្តី បានស្នើសុំការសម្រេចពីរាជរដ្ឋាភិបាល លើការស្នើសុំសញ្ជាតិខ្មែររបស់វិនិយោគិនចំនួន ២រូប។ វិនិយោគិនចំនួន ២រូបនេះ កំពុងមានគម្រោងវិនិយោគពាក់ព័ន្ធនឹងការកែច្នៃអាលុយមីញ៉ូម និងការវិនិយោគបង្កើតតំបន់សេដ្ឋកិច្ចពិសេស នៅស្រុកព្រៃនប់ ខេត្តព្រះសីហនុ ដែលមានទុនវិនិយោគសរុប ១១០លានដុល្លារ ក្នុងទំហំដី ៣០៣ហិកតា។

ក្នុងកិច្ចប្រជុំពិភាក្សាលើការស្នើការលើកទឹកចិត្ត ការអនុគ្រោះ និងការសម្រួលនីតិវិធី ក្នុងក្របខ័ណ្ឌ «កម្មវិធីពិសេសជំរុញការវិនិយោគក្នុងខេត្តព្រះសីហនុ ឆ្នាំ២០២៤» ឯកឧត្តម ហ៊ាន សាហ៊ីប ក៏បានប្តេជ្ញាក្នុងការរួមចំណែកលើកកម្ពស់បរិយាកាសធុរកិច្ចក្នុងខេត្តព្រះសីហនុ ឱ្យកាន់តែល្អប្រសើរ និងអាចអនុញ្ញាតឱ្យគោលការណ៍លើកទឹកចិត្តអនុវត្តបានភ្លាម ប្រកបដោយតម្លាភាព និងប្រសិទ្ធភាពផងដែរ៕