ភ្នំពេញ៖ «គម្រោងធ្វើឱ្យប្រសើរឡើងផ្លូវជាតិលេខ៥» ត្រូវបានសម្តេចធិបតីនាយរដ្ឋមន្ត្រី ហ៊ុន ម៉ាណែត លើកឡើងថា ជាផ្លូវជាតិដែលនឹងជំរុញវិស័យសេដ្ឋកិច្ច និងពាណិជ្ជកម្មកម្ពុជាឱ្យកាន់តែខ្លាំង ក្រោយប្រើរយៈពេលសាងសង់អស់ ៥៥ខែ។

បើតាមការចុះផ្សាយតាមរយៈទំព័រហ្វេសប៊ុករបស់សម្តេចធិបតី ហ៊ុន ម៉ាណែត ផ្លូវជាតិលេខ៥នេះ គ្រោងនឹងសម្ពោធឱ្យប្រើប្រាស់ជាផ្លូវការ នៅចុងខែវិច្ឆិកា ឆ្នាំ២០២៣។ ផ្លូវជាតិនេះ នឹងផ្តល់នូវអត្ថប្រយោជន៍ជាច្រើនដូចជា អាចបង្កើនការនាំចេញ-នាំចូល, ជាផ្លូវប្រកបដោយសក្តានុពលខ្ពស់សម្រាប់បម្រើវិស័យសេដ្ឋកិច្ចកម្ពុជា, កាត់បន្ថយគ្រោះថ្នាក់ចរាចរណ៍, ការកកស្ទះចរាចរណ៍, កំណើននៃការអភិវឌ្ឍ, វិនិយោគ និងទេសចរណ៍។

ថវិកាប្រមាណ៥០០លានដុល្លារ ត្រូវបានចំណាយលើ«គម្រោងធ្វើឱ្យប្រសើរឡើងផ្លូវជាតិលេខ៥» ដែលមានប្រវែង ៣៦៦គីឡូម៉ែត្រ ដោយឆ្លងកាត់ខេត្តកណ្តាល កំពង់ឆ្នាំង ពោធិ៍សាត់ បាត់ដំបង និងបន្ទាយមានជ័យ។ គម្រោងនេះ បានបើកការដ្ឋានសាងសង់កាលពីថ្ងៃទី២៦ ខែមីនា ឆ្នាំ២០១៨ ហើយបញ្ចប់ការសាងសង់កាលពីថ្ងៃទី១០ ខែមករា ឆ្នាំ២០២២ ប្រើរយៈពេលសាងសង់អស់ ៥៥ ខែ។

គួរជម្រាបថា ផ្លូវជាតិលេខ៥នេះ សាងសង់ឡើងដោយក្រុមហ៊ុន Tekken-Taiyo JV និងក្រុមហ៊ុន Daiho-Asanuma JV ធ្វើការត្រួតពិនិត្យបច្ចេកទេសដោយ ក្រុមហ៊ុនទីប្រឹក្សាបច្ចេកទេស KEI-OCG-KCI Joint Venture in association with KCEC និង ក្រុមហ៊ុន TANCONS។ ផ្លូវជាតិលេខ៥នេះ (ផ្លូវអាស៊ានហាយវេលេខ១) ស្ថិតក្នុងអាទិភាពគន្លឹះទី២ នៃអាទិភាពគន្លឹះទាំង៥ គឺ «មនុស្ស ផ្លូវ ទឹក ភ្លើង និងបច្ចេកវិទ្យា» នៃយុទ្ធសាស្ត្របញ្ចកោណ-ដំណាក់កាលទី១ របស់រាជរដ្ឋាភិបាលកម្ពុជា នីតិកាលទី៧៕